Եվրոպական միությունից ներմուծվող մարդատար ավտոմեքենաների և բեռնատարների համար ԱՄՆ մաքսատուրքերը հաջորդ շաբաթ կհասնեն 25 %-ի։
Այս մասին հայտարարել է ԱՄՆ նախագահ Դոնալդ Թրամփը՝ տեղեկացնելով, որ ԵՄ-ն չի պահպանում ԱՄՆ-ի հետ նախկինում կնքված առևտրային համաձայնագրի պայմանները։ Ի դեպ, դեռևս պարզ չէ, թե համաձայնագրի կոնկրետ որ դրույթներին է Թրամփը հղում կատարել՝ ԵՄ-ին խախտումների համար մեղադրելիս։
«Եթե եվրոպական ընկերությունները մեքենաներ և բեռնատարներ արտադրեն ամերիկյան գործարաններում, մաքսատուրքեր չեն գանձվի»,- ասել է նա։
Եվրախորհրդարանի առևտրի հարցերով հանձնաժողովի ղեկավար Բերնդ Լանգեն խստորեն դատապարտել է Թրամփի հայտարարած մաքսատուրքերի բարձրացումը:
«Այս վերջին քայլը ցույց է տալիս, թե որքան անվստահելի է ամերիկյան կողմը։ Այդպես չեն վարվում մտերիմ գործընկերների հետ։ Թրամփի պահվածքն անթույլատրելի է»,- հայտարարել է նա։
Լանգեի խոսքով՝ ԵՄ-ն պետք է պատասխանի առավելագույն հստակությամբ ու վճռականությամբ, ուժի դիրքերից:
«Մենք նախկինում էլ ենք տեսել նման կամայական քայլեր, նույնիսկ գործընկերների նկատմամբ։ ԵՄ-ն այժմ պետք է պահպանի հստակ և հաստատուն դիրքորոշումը»,- ասել է նա։
