Նախատեսվում է 200 նոր 18 մետրանոց էլեկտրական ավտոբուսների և 71 նոր տրոլեյբուսների ձեռքբերում, 6 նոր տրանսպորտային ենթակառուցվածքների կառուցում: Խոսքը կամուրջների, էստակադների մասին է, որի կարիքն ակնհայտորեն Երևանն ունի: Այդ մասին «Քաղաքացիական պայմանագիր» կուսակցության նախընտրական ծրագիրը ներկայացնելիս ասաց վարչապետ Նիկոլ Փաշինյանը:
«Իմիջիայլոց, որ խոսում ենք տրոլեյբուսների մասին, այս թիվը չի վերաբերում այն տրոլեյբուսներին, որոնք ապրիլին պիտի գային, Իրանի շուրջ ստեղծված իրավիճակի պատճառով մի քիչ ուշացան:
Նախորդ օրը ես տեղեկացա, որ արդեն շատ մոտ են Հայաստանին, և առաջիկա օրերին դրանց մի մասն առնվազն կմտնի ՀՀ»,- ասաց նա:
Նախատեսվում է նաև ՀՀ տարածքում միասնական տրանսպորտային ցանցի ներդրում, ինչը նշանակում է, որ բոլոր մարզերում կլինեն հանրային տրանսպորտային ցանցեր:
«Մեր մարզերի ցավոտ խնդիրներից մեկն այն է, որ բազմաթիվ բնակավայրեր կանոնավոր ուղևորափոխադրման համակարգեր չունեն, և մենք այս տրանսպորտային ցանցերի ներդրման միջոցով պետք է խնդիրը լուծենք:
Հիմա որոշ տեղերում ինչ-որ չափով ներդրված է, բայց մենք այս պրոցեսը պետք է շարունակենք, որպեսզի բոլոր բնակավայրերն ունենան կանոնավոր տրանսպորտային չվացուցակներ մարզկենտրոնի հետ, նաև, բնականաբար, Երևանի հետ»,- ասաց նա:
