Լրագրողներն այսօրվա առցանց ասուլիսի ժամանակ վարչապետից հետաքրքրվել են նաև անհետ կորածներին հայտնաբերելու ուղղությամբ տարվող աշխատանքների մասին, հարց ուղղել նրանց թվի ու գերիների փոխանակման գործընթացի մասին:
Նիկոլ Փաշինյանը նշել է, որ նրանց թիվը հայտնի է։ Խոսքը մի քանի 100 զինվորների մասին է։
«Հույս ունենք, որ կգտնենք մի մասին ողջ, եթե ոչ՝ ողջ-առողջ: Օրինակ՝ երեկ իմացա, որ վիրավոր զինվոր է հայտնաբերվել, ով համարվում էր անհետ կորած։ Ինչ վերաբերում է գերիների փոխանակմանը, տեղի կունենա մարմինների փոխանակումից հետո»:
Անդրադարձել է սգո օր հայտարարելու մասին առաջարկներին: Վարչապետը կարծում է, որ ճիշտ կլինի այդ որոշումը կայացվի մարմինների հայտնաբերման գործընթացն ավարտին հասցնելուց հետո:
«Կարևոր եմ համարում, որ երաշխավորենք զոհված զինծառայողների ընտանիքների համար նախատեսված սոցիալական երաշխիքները, նաև հաշմանդամություն ձեռք բերածների։ Կառավարությունը միջոցներ ձեռնարկում է և ունի վստահություն, որ ամեն ինչ կարվի պատշաճ մակարդակով։ Կարևոր եմ համարում շփումը զոհվածների ընտանիքների անդամների հետ, իհարկե, պետք է այդ շփումը լինի շարունակական։ Խոսեցի զինվորների հետ շփման մասին, կարևոր եմ համարում հաշմանդամություն ստացած զինվորների հետ շփումը։ Նրանց հետագա կյանքի կազմակերպումը կարևոր խնդիրներից մեկն է, և կառավարությունը պետք է ակտիվ դերակատարում ունենա։ Զինվորը պետք է տեսնի, որ հայրենիքը կանգնած է իր կողքին, առողջական խնդիրների լուծումը քննարկման թեմա չէ»,-ասել է նա:
