ՆԱՏՕ-ի երկրները 65 միլիարդ եվրոյի զենք են փոխանցել Ուկրաինային և այժմ նախապատրաստում են բազմամյա ռազմական մատակարարումների ծրագիր։ Այս մասին երկուշաբթի օրը Բրյուսելում կայացած մամուլի ասուլիսում հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ դաշինքի երկրների արտգործնախարարների՝ ապրիլի 4-5-ը կայանալիք հանդիպման նախօրեին։
«Դաշնակիցները 65 միլիարդ եվրոյի ռազմական օգնություն են տրամադրել Ուկրաինային, և ես ողջունում եմ այն փաստը, որ ժամանակակից տանկերն ու զրահափոխադրիչները սկսել են հասնել Ուկրաինա: Մենք կքննարկենք, թե ինչպես մեծացնել մեր աջակցությունը, այդ թվում՝ ուժեղացնելով Ուկրաինայի զինված ուժերը: Ես ակնկալում եմ, որ նախարարները կպայմանավորվեն Ուկրաինայի համար բազմամյա ծրագրի մշակման աշխատանքների մեկնարկի շուրջ»,- ասել է նա՝ ապրիլի 4-5-ը դաշինքի ԱԳ նախարարների հանդիպման նախօրեին։
Ըստ Ստոլտենբերգի՝ Կիևին ՆԱՏՕ-ի աջակցությունը «նախատեսված է երկարաժամկետ հեռանկարում»: Ստոլտենբերգը կարծում է, որ դա հանգեցնում է մարտադաշտում իրավիճակի փոփոխության՝ «օգնելով Ուկրաինային պաշտպանվել և հետ նվաճել իր տարածքները»։
