Ցավոք սրտի, մենք չկարողացանք կանխել դավաճանական իշխանությունների՝ արյունով գծված մեր սահմանները գրչի մեկ հարվածով թուրքին հանձնելու դավադիր ծրագիրը, Ազատության հրապարակում ընթացող հանրահավաքի ժամանակ ասաց «Հայրենիք» կուսակցության նախագահ Արթուր Վանեցյանը:
«Մեկ տարի առաջ կոչ արեցի, ասեցի՝ Նիկոլ, կանգ առ, երկիրը տանում ես կործանման, չլսեց: Այսօր ևս մեկ անգամ ասում եմ՝ Նիկոլ, կանգ առ, մի ծախիր մեր հայրենիքը: Այստեղ հավաքվել ենք ոչ թե իշխանափոխության, այլ մեկ նպատակով՝ մեր երկիրը, մեր Արցախն ու ինքնությունը փրկելու: Հայ ազգը երբեք չի ընկրկելու, հայ ազգը հաղթող ազգ է և անպայման հաղթելու է», — ասաց Վանեցյանը:
Նա շեշտեց՝ ոչ ոք տուն չի գնալու, կանգնելու են՝ մինչև հասնեն երկրի ապագայի փրկությանը:
«Այն գործակալական ցանցերը, որոնք 2.5 տարվա ընթացքում փորձում էին փչնչացնել մեր ազգային ինքնությունը, այսօր Արցախում կործանեցին հազարավոր երիտասարդների: Մենք իրավունք չունենք մեր զավակների, հայրերի համար այստեղից մի քայլ հեռանալու, և մեր պայքարը տանելու ենք մինչև վերջ: Այդ վերջը շատ մոտ է», — ասաց Արթուր Վանեցյանը:
