![]()
Երեւանի թիվ 93 մանկապարտեզի ցանկապատման չարչրկված հարցը կարծես թե լուծված է։
Երեւանի ավագանու այսօրվա նիստում, երբ զեկուցվում էր մանկապարտեզներին վերաբերող նախագիծ, ավագանու «Լույս» խմբակցության անդամ Անի Խաչատրյանը հարցադրում արեց՝ ասելով․ «Չգիտեմ այս նախագծի մեջ ներառվում է, թե չէ Բլեյանի բազմաչարչար դպրոցին հարակից ցանկապատը, բայց մանկապարտեզը վերանորոգման է դրված։ Ուզում եմ հրապարակային լսել պատասխանատուներից՝ արդյոք մանկապարտեզի վերանորոգումից հետո էդքան շոշափված ցանկապատի լինելո՞ւ է, թե՞ չէ»։
Պատասխանելով Անի Խաչատրյանին՝ Երեւանի քաղաքապետ Հայկ Մարությանն ասաց․ «Ես ցանկապատների հարցերով չեմ զբաղվում, բայց եթե օրենքով սահմանված է, ուրեմն, այո, կլինի։ Հաստատում եմ»։
Քաղաքապետը նաեւ հայտնեց, որ ցանկապատվող՝ Երեւանի համար 93 մանկապարտեզին հարակից եւս մեկ մանկապարտեզ կա, որը նույնպես վերանորոգվելու է ու ցանկապատ դրվի։ Փոխքաղաքապետ Հրաչյա Սարգսյանն էլ հավելեց, որ ՄԱԿ-ի հետ համագործակցության շրջանակներում «Երեւանի էներգաարդյունավետության» ծրագրի դրամաշնորհային համաձայնագրի արդյունքում են իրականացնելու մանկապարտեզի վերանորոգումը։ «N93 մանկապարտեզը եւս ներառված է այդ ցանկում»,- ասաց Սարգսյանը։
Հիշեցնենք՝ տեւական ժամանակ պայքար էր գնում մի կողմից Մխիթար Սեբաստացի կրթահամալիրի, մյուս կողմից համար 93 մանկապարտեզի ու Երեւանի քաղաքապետարանի միջեւ։ Քաղաքապետարանը պաշտպանում էր համար 93 մանկապարտեզի՝ ցանկապատ ունենալու որոշումը, իսկ հարեւանությամբ գործող Մխիթար Սեբաստացի կրթահամալիրը դեմ էր ցանկապատին։
Մխիթար Սեբաստացի կրթահամալիրն ունի 7 դպրոց, որոնք գործում են Երեւանի Հարավարեւմտյան թաղամասի տարբեր հատվածներում: Ավելի վաղ կրթահամալիրի տնօրեն Աշոտ Բլեյանը հայտնել էր՝ աշակերտները, ուսուցիչները, որպեսզի կարողանան մասնակցել ուսումնական պլանով որոշված պարապմունքներին, մի մասնաշենքից մյուսն են գնում, իսկ այդ ճանապարհն անցնում է հարակից N93 մանկապարտեզի կողքով:
Մանկապարտեզի աշխատակազմն էլ ցանկանում է տարածքը ցանկապատել եւ այն առանձնացնել հարեւան ուսումնական հաստատություններից, որպեսզի տեղի բնակիչներն ու անծանոթ մարդիկ այնտեղ մուտք չգործեն:
![]()