Կառավարության շենքում հրավիրած ասուլիսի ժամանակ ՀՀ վարչապետ Նիկոլ Փաշինյանն անդրադարձավ հարցին, թե մի կողմից հայտարարվում է, որ Հայաստանն ու Ադրբեջանը մոտ են խաղաղության պայմանագրի ստորագրմանը, մյուս կողմից՝ այդ երկիրը շարունակում է Հայաստանից տարածքային պահանջներ ներկայացնել՝ թիրախավորելով Տավուշի 4 գյուղերը և այդ ֆոնին զորավարժություններ է իրականացնում:
«Ես նախ ուզում եմ անդրադառնալ նրան, թե որն է Հայաստանի Հանրապետությունը, առաջին անգամ վիզուալ պատասխան եմ պատրաստել»,- ասաց վարչապետը՝ պարզելով ՀՀ քարտեզի մակետը:
«Եկեք մի պահ մի կողմ թողնենք Ադրբեջանին և մեր ելակետից հանդես գանք, որովհետև ասվում է, որ ՀՀ կառավարությունը պատրաստվում է գյուղեր հանձնել Ադրբեջանին: Երբեք ոչ մի քննարկման ժամանակ խոսք չի եղել և խոսք չի կարող լինել Տավուշի մարզի որևէ գյուղ հանձնելու մասին: Երբ ադրբեջանական մամուլում բարձրացվում են գյուղերի անուններ, ՀՀ տարածքում երբեք այդպիսի անուններով գյուղեր չեն եղել, ընդ որում՝ ոչ միայն խորհրդային ժամանակներում, այլև դրանից հետո»,- շեշտեց Կառավարության ղեկավարը:
Վարչապետը ընդգծեց՝ պետք ելնել դե յուրե իրողությունից. այն, ինչ Հայաստան է՝ Հայաստան է, այն, ինչ Ադրբեջան է՝ Ադրբեջան է:
Առավել մանրամասն՝ տեսանյութում:
