ՀՀ փոխվարչապետ Մհեր Գրիգորյանի գրասենյակը հերքում է ադրբեջանական կողմի տարածած տեղեկությունները։ Հայաստանի և Ադրբեջանի միջև պետական սահմանի սահմանազատման ու սահմանագծման հարցերով երկու երկրների հանձնաժողովների հանդիպմանն ադրբեջանական կողմին ականապատ դաշտի քարտեզներ տրամադրելու հարց չի քննարկվել։
Այս մասին «Հայկական ժամանակ»-ի հետ զրույցում հայտնեցին գրասենյակից:
Ավելի վաղ ադրբեջանական լրատվամիջոցները հայտնել էին, որ Ադրբեջանի և Հայաստանի փոխվարչապետների հանդիպման ժամանակ հայկական կողմը 3 շրջանի ականապատ դաշտերի քարտեզ է հանձնելու:
Իջևան-Ղազախ սահմանին այսօր մեկնարկել էր Հայաստանի և Ադրբեջանի փոխվարչապետների հերթական հանդիպումը։ Այս մասին հայտնել էին ադրբեջանական լրատվամիջոցները։
Հիշեցնենք, որ սահմանազատման հանձնաժողովների վերջին հանդիպումը տեղի էր ունեցել նոյեմբերի 30-ին։
Այս հանդիպմանը, ինչպես հայտարարվել է նախապես, կսահմանվեն փաստաթղթերի տեսակները, կնույնականացվեն քարտեզները։
Հայաստանի և Ադրբեջանի փոխվարչապետների գլխավորած հանձնաժողովները մինչ այժմ 5 հանդիպում են անցկացրել։
