Ինչպես ավելի վաղ հայտնել էինք, Արցախի Պաշտպանության բանակի ներկայացուցիչ Սուրեն Սարումյանն այսօր, ամփոփելով օրը, ասել է, որ մարտական գործողություններից մեկի առանձնահատկությունն էլ այն է, որ ադրբեջանական կողմը որոշ ուղղություններում կարողացել է ներթափանցել Արցախի բուն տարածք:
«Այն հատվածներում, որոնք համարվում են անվտանգության գոտի, մեր նահանջը պայմանավորված է եղել հաճախ մարտավարական նկատառումներով: Այսինքն, երբ գործ ունենք հարթավայրային տարածքի հետ, իսկ ավելի նպաստավոր բնագծեր կարելի է զբաղեցնել բարձունքներում, ավելի նպատակահարմար է կատարել խուսավարում և զբաղեցնել այդ բարձրունքները՝ հակառակորդի գործողություններին առավել արդյունավետ հակազդելու, նրան առավել արդյունավետ խոցելու համար», – ասել է Սարումյանն՝ ավելացնելով, որ Արցախի տարածքում կատարվող գործողությունները հակառակորդին չեն ներվելու: Արցախի Պաշտպանության բանակի ներկայացուցիչն ասել է, որ պետք է վստահ լինել՝ բանակը կարողանալու է ջարդել հակառակորդին, կարողանալու է զսպել զավթողական նկարտումները, ավերապահորեն կատարել իր խնդիրը:
Ըստ Արցախի Պաշտպանության բանակի ներկայացուցիչ Սուրեն Սարումյանի՝ զորքի տրամադրությունը մարտական է, պատրաստ են պաշտպանել հայրենիքը:
