Բալը շատ համեղ ու տարածված մթերք է, որը կիրառվում է ինչպես առանձին, այնպես էլ տարատեսակ աղանդերների, ըմպելիքների ու ուտեստների պատրաստման համար, սակայն այս մթերքը ոչ միայն համեղ է, այլև անչափ օգտակար, քանի որ պարունակում է հսկայական քանակությամբ սննդարար նյութեր։ Այնուամենայնիվ մարդիկ հաճախ անուշադրության են մատնում այս կարևոր մթերքն ու թերագնահատում են դրա օգտակարությունը, ուստի ձեր ուշադրությանն ենք ներկայացնում հինգ պատճառ հաճախ բալ ուտելու համար։
Հարուստ է սննդարար նյութերով
Բալը պարունակում է հսկայական քանակությամբ սննդարար նյութեր։ Ընդմենը մի բաժակ կամ 154 գրամ բալը (առանց կորիզների) պարունակում է 2 գրամ սպիտակուց, 25 գրամ ածխաջրեր և 3 գրամ սննդային մանրաթելեր։ Բացի այդ, բալի այդ քանակությունն ապահովում է վիտամին C-ի օրական անհրաժեշտ չափաբաժնի 18%-ը, կալիումի օրական անհրաժեշտ չափաբաժնի 10%-ը, պղնձի օրական անհրաժեշտ չափաբաժնի 5%-ը և մանգանի օրական անհրաժեշտ չափաբաժնի 5%-ը։ Ավելին՝ մասնագետները նշում են, որ բալը հարուստ է ֆիտոքիմիական նյութերով՝ պոլիֆենոլներով, որոնց շնորհիվ էլ այդքան օգտակար է օրգանիզմի համար։
Պաշտպանում է թթվայնացնող սթրեսի ազդեցությունից
Բալը նաև հայտնի է հակաօքսիդանտների բարձր պարունակությամբ, ինչը նշանակում է, որ այն արդյունավետ կերպով պայքարում է թթվայնացնող սթրեսի դեմ՝ այդ կերպ նվազեցնելով վաղաժամ ծերացման ու քրոնիկ հիվանդությունների, այդ թվում՝ սրտի հիվանդությունների, շաքարային դիաբետի, թուլամտության ու անգամ քաղցկեղի որոշ տեսակների զարգացման հավանականությունը։
Բարելավում է մկանների վերականգնման գործընթացը
2016 թվականին բրազիլացի գիտնականների անցկացրած հետազոտությունը ցույց է տվել, որ բալում պարունակվող հակաբորբոքային ու հակաօքսիդանտային միացություններն օգնում են մեղմել ցավը ֆիզիկական ծանրաբեռնվածության հետևանքով մկանների վնասվածքների դեպքում։
Բարելավում է քնի որակը
Բալը պարունակում քնի որակի բարելավման համար անհրաժեշտ հիմնական բնական սննդարար նյութերի զգալի մասը։ Այն հարուստ է անգամ մելատոնինով, որը մասնակցում է քնի ցիկլերի կարգավորման գործընթացին։
Մեղմում է հոդատապի ախտանշանները
Այս մթերքն օգնում է նաև մեղմել ցավն արթրիտի ու անգամ հոդատապի դեպքում։ Հոդատապը միզաթթվի կուտակմամբ պայմաբավորված հիվանդություն է, որը կարող հանգեցնել հոդերում սաստիկ այտուցների ու բորբոքումների առաջացման ու դառնալ ուժգին հոդացավերի պատճառ։
