ՀՀ վարչապետ Նիկոլ Փաշինյանը Կառավարության նիստում լրագրողների հետ ասուլիսում հստակեցրել է ԵԱՏՄ-ից դուրս գալու ժամկետների և արտահանման շուկաների դիվերսիֆիկացման վերաբերյալ հայկական կողմի դիրքորոշումը։
Պատասխանելով հարցին, թե արդյոք ԵԱՏՄ-ում մնալը ռուսական ճնշումների հետևա՞նք է, վարչապետը հերքել է՝ ընդգծելով, որ դա Հայաստանի ինքնիշխան որոշումն է, և ԵԱՏՄ-ից դուրս գալը ուղիղ կապված է Եվրամիությանն անդամակցելու գործընթացի հետ։
«Ես ասել եմ, որ մինչև այն կետը, քանի դեռ Եվրասիական տնտեսական միությանն անդամ լինելը և Եվրամիությանն անդամագրվելու գործընթաց սկսելու մասին օրենքի նախագծի պրոցեսները համատեղելի են, մենք այդ ճանապարհով գնալու ենք: Դա կարող է համատեղելի լինել մինչև 2030 թիվը, դա կարող է համատեղելի լինել մինչև 2026 թվի դեկտեմբերը, կամ մինչև 2027 թվի հունիսը։ Ժամանակը ցույց կտա։ Դա մեր ինքնիշխան որոշումն է»,- ընդգծել է Փաշինյանը։
Ավելի վաղ ՀՀ արտաքին գործերի նախարարությունից «Հայկական ժամանակ»-ին հայտնել էին, որ ստացել են ՌԴ էներգետիկայի նախարար Սերգեյ Ցիվիլյովից նամակ՝ ուղղված ՀՀ տարածքային կառավարման և ենթակառուցվածքների նախարարությանը:
Ըստ ՀՀ արտաքին հարցերով գերատեսչության՝ նամակը փոխանցվել է, կուսումնասիրվի, և հայկական կողմն ըստ անհրաժեշտության կարձագանքի:
Տարածքային կառավարման և ենթակառուցվածքների նախարար Դավիթ Խուդաթյանը լրագրողների հետ զրույցում նամակի բովանդակության վերաբերյալ մանրամասներ չի հայտնել՝ խնդրելով թույլ տալ ուսումնասիրել այն:
