Բանաստեղծ Հակոբ Մովսեսը կարծում է, որ մենք կոռուպցիա բառն օգտագործում ենք՝ ամբողջապես չհասկանալով դրա կործանարար համակարգը:
«Սա ապականություն է: Տաղանդին դարձնում են անտաղանդ, անտաղանդին բերում են առաջին պլան, մշակույթը դարձնում են զվարճանքի առարկա: Կոռուպցիան ազգ կործանող բան է: Չինաստանում պետական կաշառակերը մահապատժի է ենթարկվում: Վերջին մի քանի տարում մեր երկրում դրա դեմն առնվում է: Այսօր, երբ ասում ենք պետական պաշտոնյա, չենք պատկերացնում կաշառակեր, իսկ առաջ, երբ ասում էիր պետական պաշտոնյա, կաշառքի դռները բացվում էին»,- նկատում է նա:
Ըստ նրա՝ հունիսին սպասվող խորհրդարանական ընտրությունները այն մասին են՝ ուզո՞ւմ ենք պետություն ունենալ, թե՞ քռքաշ ապրենք. «Շատ լուրջ ընտրության առաջ ենք կանգնած, իսկ ձայն վաճառելը քաղաքական մարմնավաճառություն է»:
Հակոբ Մովսեսը միաժամանակ նկատում է. «Նախկինում ինչքան մեծահարուստ, առևտրականներ կային, հավաքել, բերել լցրել էին Ազգային ժողով, Ազգային ժողովը դարձրել եսիմ ինչ: Ռուսաստանն էլ այդ աչքերով է մեզ նայում, որ սա փողի ժողովուրդ է, ինչ ուզենք կարող ենք անել»:
Բանաստեղծի նկատառմամբ՝ գործող իշխանությունը փոխել է մեր ժողովրդի պատկերացումները իշխանության և իշխանավորի մասին:
«Ժողովուրդը իշխանավորի միայն երազում կարող էր տեսնել, էլ ուր մնաց բանավիճեր նրա հետ, անհամաձայնության հարթություններ բացեր: Ես ուրախ եմ, որ այսօր փողոցում կարող եմ մոտենալ իմ երկրի ղեկավարին, շնորհակալություն հայտնել կամ մատ թափ տալ նրա վրա: Իշխանությունների շնորհքն է նաև, որ այսօր նախկին նախագահները դուրս են գալիս փողոց, շփվում են ժողովրդի հետ, նախկինում նման բան չենք տեսել»,- ասում է նա:
Ինչ վերաբերում է ՀՀ-ՌԴ հարաբերություններին, զրուցակիցը ընդգծում է՝ մենք ՌԴ-ի դեմ թշնամանք չունենք, սակայն պետք է պատասխանել հարցին՝ արդյոք Ռուսաստանը որևէ հարմար պահի ՀՀ-ն չի՞ հանձնի. «Եթե պետք է մեզ գազի «կարթից» կախված ձկան պես պահի, ավելի լավ է՝ փակեն, մենք էլ մեր ճարը տեսնենք»:
Առավել մանրամասն՝ «Հայկական ժամանակ»-ի հետ հարցազրույցում:
