«Կարծում եմ՝ նման խնդիրներ չկան, 30 տարվա մեջ միշտ խնդիրներ եղել են, դրանք քաղաքական գործիքներ են, որոնք օգտագործվում են տարբեր երկրների կողմից, առավել ևս խոշոր երկրի»,- լրագրողների հետ ճեպազրույցում անդրադառնալով այն հարցին, թե ՌԴ-ի հետ հարաբերություններում հայ գործարարները խնդիրներ ունեն՝ ասաց ՔՊ խմբակցության պատգամավոր Խաչատուր Սուքիասյանը:
Սուքիասյանը նշեց, որ Հայաստանն էլ ինչ-որ գործիքներ ունի, որոնք այդ ընթացքում քննարկման ժամանակ երևում է. «Վերջին հաշվով, սա մի քաղաքական, դիվանագիտական գործընթաց է, որն ինչ-որ մի ընթացք է ստացել և ընթացքում համաշխարհային հարթակներում տիրող իրավիճակը կբերի նրան, որ ավելի ճիշտ որոշումներ կկայացվեն, որովհետև վերջին հաշվով իրավիճակն էլ թելադրող ինչ-որ հատվածներ ունի, որոնց պետք է ուշադիր լինենք»:
Անդրադառնալով հայ-ռուսական հարաբերություններին՝ Սուքիասյանը նշեց. «Ընդհանրապես այդ հարաբերությունների սրման պատճառը միշտ լինում է ՀՀ-ի ինքնիշխանության պատճառով, երբ ՀՀ-ն ուզում է ավելի մեծ ինքնիշխանություն ունենալ, ավելի անկախ որոշումներ կայացնել, իհարկե, այդ ամենը սկսում է ավելի ճնշվել, որովհետև շատ երկրներ չեն ուզում, որ ՀՀ-ն լինի ինքնիշխան, ուզում են լինի այլ փոխհարաբերությունների հարթակում»:
