Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը պնդել է, որ Ռոմանոս Պետրոսյանին ՀԷՑ-ի ժամանակավոր կառավարիչ նշանակելու որոշումը բացառապես իրենն է։
Նա այդ մասին ասել է Կառավարության նիստից հետո՝ լրագրողների հետ ճեպազրույցում՝ արձագանքելով լրագրողների դիտարկմանը, թե նշանակման որոշումը ՀՀ վարչապետ Նիկոլ Փաշինյանինն է եղել, իսկ ինքը դեմ չի եղել:
«Ո՛չ, Ռոմանոս Պետրոսյանին ես եմ նշանակել, որովհետև ճանաչում եմ բավականին վաղուց ու գնահատում եմ նրա կառավարչական որակները հատկապես վերջին 3,5 տարիների ընթացքում ՊՎԾ-ում իր կառավարչական արդյունավետ աշխատանքը: Այս պահին, իմ համոզմամբ, ՀԷՑ-ում ժամանակավոր կառավարիչը պետք է լավ մենեջեր լինի, և այդ որակները, այդ կրթությունն օրենքով սահմանված պահանջներին բավարար լինելու պայմաններում իմ ընտրությունը կանգնել է նրա վրա»,- մանրամասնել է Մեսրոպյանը։
Հարցին, թե ինչ կլիներ, եթե Փաշինյանը դեմ լիներ Ռոմանոս Պետրոսյանի թեկնածությանը, Մեսրոպյանը նշել է. «Ես եմ որոշում»։
Նրա խոսքով՝ օրենքով դա իրեն տրված բացառիկ իրավունք է։
