Էկոնոմիկայի նախարար, «Քաղաքացիական պայմանագիր» կուսակցության վարչության փոխնախագահ Գևորգ Պապոյանը կարծում է, որ կուսակրոն հոգևորականները զանգվածաբար չեն պահել երդումը, այդ թվում՝ Ամենայն հայոց կաթողիկոսը: Վերջինս նկատում է՝ այս ամենը ոչ մեկը չի հերքում, իսկ եթե հերքեն, անուններ կտրվեն, թե ով ում կինն է, ովքեր են երեխաները:
Ըստ Պապոյանի՝ քանի որ Գարեգին Բ-ն չի պահպանել երդումը, ապա այդ քաղաքացին չի կարող լինել կաթողիկոս, որոշներն էլ՝ արքեպիսկոպոս և եպիսկոպոս: Հետևաբար Գարեգին Բ-ն իր համար այլևս կաթողիկոս չէ, նա ՀՀ քաղաքացի Կտրիճ Ներսիսյանն է:
Պապոյանը կարծում է, որ Եկեղեցու ուխտը խախտածները ջղաձիգ շարժումներ են կատարում, քանի որ գիտեն՝ սրբապղծությունների շարք է բացահայտվելու. «Տարբեր մեկնաբանություններ են տալիս, ասում են՝ բա 21-րդ դարում… ընդհուպ ասում են՝ բա հո տղամարդու հետ չէինք քնելու, կնոջ հետ պիտի և այլն: Այսինքն՝ լկտիության սահմանն անցնող մեկնաբանություններ են, որոնք անթույլատրելի են»:
Նրա խոսքով՝ պետք է Եկեղեցին ազատագրել այս մաֆիոզ խմբավորումից, որովհետև նրանք գրավել են համակարգը: Պապոյանի նկատառմամբ՝ Հայ առաքելական եկեղեցին պետք է դառնա այն վայրը, որտեղ իրապես մարդիկ կկարողանան հաղորդակցվել Աստծո հետ:
Գևորգ Պապոյանը ուշադրություն է հրավիրում այն հանգամանքին, որ Եկեղեցու հետևորդների թիվը կրճատվում է, աղանդավորական շարժումները ծաղկում են:
Առավել մանրամասն՝ «Հայկական ժամանակ»-ի հետ հարցազրույցում:
