Կրթվելը որևէ տարիքում չի կորցնում իր արդիականությունը. քաղցկեղը հաղթահարած և սիրելի զբաղմունքը գտած կինը

Քաղցկեղի ծանր փուլը հաղթահարելուց մինչև տիկնիկագործությամբ զբաղվել. այսպես է սկսվել 68-ամյա Սուսաննա Գալստյանի կյանքի նոր փուլը:

Լոռու մարզի Սպիտակ քաղաքի բնակիչը այժմ մեծ ոգևորությամբ է խոսում դրա մասին, թե երբ, ինչպես որոշեց կրթությունը շարունակել, գտնել հետաքրքիր զբաղմունք ու դա դարձնել աշխատանք։

«2018 թվականին հաղթահարել եմ քաղցկեղ հիվանդության ծանր փուլը, ապաքինման փուլում զբաղվել եմ տիկնիկագործությամբ. այն դարձել է ինձ համար հոբբի, հիվանդությունը հաղթահարելու թերապիա։ 2024 թվականի վերջում որոշեցի մասնակցել նաև սոցիալական ձեռներեցների դասընթացին, որի ավարտից հետո արժանացել եմ մրցանակի»,- «Հայկական ժամանակ»-ի հետ զրույցում ասում է նա։

68 տարեկանում Սուսաննան անցել է թոշակի, 5 տարի տանն է եղել, բայց նրա կյանքում, ինչպես վերջինս է բնութագրում, բեկում է եղել, ու այս տարիքում անցել է աշխատանքի, երբ իր տիկնիկները բրենդավորվել են. «Սպիտակի քաղաքապետի միջնորդությամբ ինձ մշակույթի տանը սենյակ հատկացվեց, որը վերանորոգելուց հետո դարձավ այն անկյունը, որտեղ ես սկսեցի զբաղվել մանկահասակ երեխաներին իմ հմտությունները սովորեցնելով։ Սա համարում եմ բեկում իմ կյանքում, մեծագույն ձեռքբերում, որը դժվարությամբ, բայց մեծ ոգևորությամբ հաղթահարեցի։ Ուրախ եմ, որ այդ ճանապարհը անցել եմ ու կայացել»։

Իր արվեստանոցի փոքրիկ անկյունում նա նաև դասեր է կազմակերպում 7-րդ դասարանի երեխաների համար, մտածում է դասընթացները հասանելի դարձնել նաև աշխատանք չունեցող, ֆինանսական խնդիրներ ունեցող անձանց համար։

68-ամյա Սուսաննան նաև մասնակցել է Սպիտակում կայացած «Կրթվելը նորաձև է» արշավի շրջանակներում իրականացվող դասընթաց-հանդիպումներին։ Ասում է՝ իր կյանքի փոփոխությունները համահունչ են այս կրթական արշավի ծրագրին։

«Ես՝ որպես դասընթացների ճանապարհ անցած կին, սիրով մասնակցեցի և շատ լավ տպավորություններ ունեցա։ Շատ լավ էր։ Շատ բան հասկացա ու ընդունեցի իմ առօրյա կյանքից ներս։ Ես կարողացա 68 տարեկանում հաղթահարել իմ խոչընդոտներն ու հասնել այնտեղ, որ մասնակցեցի դասընթացների, կրթություն ստացա։ Դա ինձ համարձակ դարձրեց և նպաստեց նրան, որ շարժման մեջ ես տեսնում եմ ինձ պես կանանց, մարդկանց, որոնք ճանապարհ ունեն անցնելու, հետք ունեն այս կյանքում թողնելու»,- ասում է նա։

Կնոջ խոսքով՝ կյանքին այլ հայացքով ես նայում, երբ 68 տարեկանում խիզախում ես ապացուցել, որ կարող ես կյանքդ նոր կետից սկսել, ունենալ սիրած զբաղմունք․ «Կրթվելը բոլոր տարիքում չի կորցնում իր արդիականությունը, ժամանակն առաջ է շարժվում, նորանոր հայտնագործություններ են լինում, մարդը ինֆորմացիայի պակաս չի ունենում ու կարողանում է այլ հմտությունների տիրապետել։ Դու էլ քո ուժերին ավելի ես վստահում ու կարողանում քեզ այլ լույսի ներքո զգալ որպես գրագետ անձնավորություն»։

Loading

Մի մոռացեք կիսվել Ձեր ընկերների հետ