«Մեր լուսահոգի հերոսներն ընկան, որ Հայը ապրի, որ մենք միասին գնանք դեպի հաղթանակներ…». Ալեն Սիմոնյան

ԱԺ փոխնախագահ Ալեն Սիմոնյանը ուղերձ է հղել, որը ներկայացնում ենք ստորև.

«Սիրելի՛ հայրենակիցներ, ընկերներ, 2020-ին մենք՝ բոլորս, անմարդկային փորձության միջով անցանք: Այդ տարին բոլորիս կորուստներ, ցավ, լաց և դժբախտություն բերեց:

Ճակատագրի բերումով հենց մեզ բաժին հասավ այս արհավիրքների ժամանակահատվածը: Բայց ես վստահ եմ, որ մենք, մեր սերունդն առաքելություն ունենք: Մենք տեսանք թե՛ հաղթանակներ և թե՛ պարտություն, և հիմա պետք է բոլորով նայենք դեպի ապագա:

Մենք պետք է մեզ պատրաստենք հաղթանակների, որոնք առջևում են, և միասին համառորեն գնանք առաջ: Հազարամյակները մեզ սովորեցրել են հարվածներ պահել:

Մենք վերապրեցինք մեր պատմության ևս մի սև էջ: Մեր լուսահոգի հերոսներն ընկան, որ Հայը ապրի, որ մենք միասին գնանք դեպի հաղթանակներ, և մենք դա կանենք:

Գիտակցելով անցյալում եղած բոլորիս սխալները՝ մենք 2021 թվականը պետք է միասին վերածենք նոր ձեռքբերումների տարվա:

Ուզում եմ նաև, որ 2021-ին մենք սկսենք սիրո, միասնականության, հանդուրժողականության, ներողամտության պատրաստակամությամբ:

Եվ մենք դա կարող ենք ու կանենք: Կանենք հանուն մեր ընկած հերոսների, հանուն մեր ապագայի, հանուն մեր երեխաների, հանուն մեր ընտանիքների, հանուն մեր ժողովրդի, հանուն Հայաստանի, որը հավերժ է:

Սեր, հաջողություն և երջանկություն եմ մաղթում գալիք 2021 թվականին, և Աստված մեզ օգնական»:

Loading

Մի մոռացեք կիսվել Ձեր ընկերների հետ