Օգոստոսի 26-ին Երեւանի Քանաքեռ-Զեյթուն վարչական շրջանի Ռայնիսի 1 հասցեում քառահարկ շենքի պայթյունի հետեւանքով անթօեւան մնացած բնակիչներն առաջիկա 10 օրը կմնան հյուրանոցում, դրանից հետո բնակարան կվարձակալեն: Այս մասին «Հայկական ժամանակին» հայտնեց Երեւանի քաղաքապետի մամուլի քարտուղար Հակոբ Կարապետյանը՝ հավելելով՝ բնակարանների վարձակալության գումարը կփոխհատուցի քաղաքապետարանը:
Հիշեցնենք՝ Ռայնիսի պայթյունի հետեւանքով անօթեւան մնացած 9 ընտանիք տեղավորվել էր հյուրանոցում: Ավերվել էր ընդհանուր առմամբ 12 բնակարան: Քաղաքապետարանից նաեւ հայտնեցին, որ շենքի մյուս շքամուտքերի բնակիչները շարունակում են ապրել իրենց տներում:
ԱԻՆ Սեյսմիկ պաշտպանության տարածքային ծառայություն ՊՈԱԿ -ի Կառուցվածքների սեյսմակայունության վարչության պետի տեղակալ Գուրգեն Նամալյանը «Հայկական ժամանակի» հետ զրույցում հայտնեց՝ Ռայնիսի 1 հասցեում գտնվող տվյալ շենքի 1-ին, 2-րդ եւ 3-րդ շքամուտքերը բացարձակապես ապահով են, միանշանակ կարելի է ապրել: Իսկ այ 4-րդ շքամուտքում մասնագետը նկատել է որոշակի ձեւախախտումներ:
«Ցավոք սրտի դեպքի օրը հնարավոր չէր բնակարաններ մտնել, որպեսզի մանրամասն ճաքերը եւ այլն տեսնեինք: Բայց հենց մուտքում նոր ճաքեր կան, դրա համար առաջարկվել է 4-րդ շքամուտքում մանրամասն հետազոտություն կատարել: Դե իսկ 5-րդը ավերված է: Պայթյունի օրը տեղում էինք, ես իմ նախնական կարծիքն ասել եմ, որը հետագայում ամբողջությամբ հիմնավորվեց՝ շենքն ամուր է»,- ասաց վարչության պետի տեղակալը, հավելելով, որ պայմանավորվածություն է ձեռք բերվել նախնական ուսումնասիրությունից հետո ապահովության համար եւս մեկ անգամ համապատասան ուսումնասիրություն կատարել:
Վերջինիս խոսքով՝ քաղաքի այդ հատվածի շենքերն առանձնահատուկ կոնստրուկտիվ լուծում ունեն իրենց ամրության տեսանկյունից: Շենքերն անհամեմատ ամուր են: «Միգուցե շահագործման տեսանկյունից հարմարավետ չեն՝ հարկայնությունը ցածր է, ժողովուրդը «խրուշչովկա» է ասում, ձմռանը սառն է, ամռանը՝ շոգ, սենյակները նեղ եւ այլն, բայց զուտ ամրության տեսանկյունից բացառիկ լավն են ու սեյսմակայուն: Նմանատիպ շենքերից սպիտակի ավերիչ երկրաշարժի ժամանակ ոչ մի հատ չէր փլուզվել, վնասվածներն էլ մասնակի էին վնասվել»,- ասաց Նամալյանը:
