«Խորհրդարանում Ոստիկանապետի և ԱԱԾ տնօրենի պաշտոնները քաղաքական դարձնելու նախագիծն առաջին ընթերցմամաբ ընդունվեց։ Սա պետք է փոխկապակցության մեջ դիտարկել։ Առաջին քայլերն են, սակայն ողջունելի են։
Երկու միավորներն էլ, որոնք ժառանգություն են մնացել խորհրդային բոլշևիկյան ժամանակներից, և դրան, ըստ էության, ոչ ոք լրջորեն չի անդրադարձել՝ վերափոխելու և ժամանակի պահանջներին համահունչ կառույցներ ստեղծելու իմաստով։ Պետք է նկատի ունենանք, որ այդ մարմինները նախորդ ռեժիմի մահակներն են եղել և իրենք որոշակի քավարանով անցնելու խնդիր ունեն»,- ArmDaily.am-ի հետ զրույցում, անդրադառնալով ԱԱԾ արդեն նախկին տնօրեն Արթուր Վանեցյանի և նախկին ոստիկանապետ Վալերիյ Օսիպյանի հրաժարականներին, ասաց «Սասնա ծռեր» կուսակցության քաղաքական խորհրդի անդամ Գարեգին Չուգասզյանը:
Դիտարկմանը, թե խոսքը մարմինների մասին է, թե կոնկրետ անձանց, այս դեպքում Օսիպյանի և Վանեցյանի, Չուգասզյանը նշեց, որ առաջին հերթին մարմիններին, իսկ քանի որ հեղափոխությունից հետո այդ մարմիններում լուրջ փոփոխություններ չեն արվել, ուրեմն նաև անձանց։
Հարցին, թե վերջերս հանդիպում են ունեցել վարչապետ Նիկոլ Փաշինյանի հետ և արդյոք այս պաշտոնանկությունների հարցը քննարկվել է, «Սասնա ծռեր» կուսակցության քաղաքական խորհրդի անդամը պատասխանեց, որ հանդիպման ժամանակ քննարկել են անցումային արդարադատության հարցը, որը այդ գործընթացը պետք է ի վերջո սկսել։
«Այնարագությունը, որով դա ընթանում է, առանց իրավաքաղաքական գնահատական տալու նախորդ ռեժիմին, բավականին բարդացնում է այն փոփոխությունների ընթացքը, որով Հայաստանը պետք է անցնի։ Իրավական, ուժային մարմիններում նույնպես պետք է որոշակի անցումային արդարադատության գործիքակամ օգտագործվի»,-հավելեց նա։
Դիտարկմանը, թե մեր տեղեկություններով վարչապետի հետ հանդիպման ընթացքում «Սասնա ծռեր» կուսակցության անդամները բարձրացրել են Արթուր Վանեցյանի և Վալերիյ Օսիպյանի հրաժարականների հարցը և նրանց հրաժարականի դեպքում պատրաստակամություն հայտնել սատարել Փաշինյանին, Չուգասզյանը պատասխանեց. «Մենք նման բան չենք քննարկե։
Մենք քննարկել ենք գնալով ահագնացող ռևանշի հնարավորությունը Հայաստանում և դա բնականաբար ռևանշը կարող է տարբեր սցենարներով ընթանալ, այդ թվում նաև դավադրական սցենարներ կարող են լինել։Սակայն մենք հատուկ չենք քննարկել որևէ անձի կամ մարմնի շուրջ առաջացած իրավիճակը։ Մենք խոսել ենք ընդհանուր քաղաքական հարցերից, իրավիճակից»։
