«Հայաստան» համահայկական հիմնադրամի նախկին գործադիր տնօրեն Արա Վարդանյանն ու փոխկապակցված մեկ այլ անձ՝ Մարիամ Սահակյանը կանչվել են ՀՀ դատախազության ապօրինի ծագում ունեցող ույքի բռռնագանձման գործերով վարչություն։ Այս մասին civic.am-ը տեղեկացավ հրապարակային ծանուցումների պաշտոնական կայքից։ Ծանուցագրերը զետեղվել են երեկ, Վարդանյանն ու Սահակյան պետք է դատախազություն ներկայանան ս․թ․ մարտի 1-ին։ «Գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր:
Դուք իրավունք ունեք սույն ծանուցագիրը ստանալու պահից մեկ ամսվա ընթացքում ներկայանալ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն, ծանոթանալու ուսումնասիրության նյութերին, ներկայացնելու դիրքորոշում, ինչպես նաև հայտարարագիր»,-նշված է Վարդանյանին ուղղված ծանուցագրում։ Մարիամ Սահակյանին ուղղված ծանուցագրում էլ նշված է, որ Արա Վարդանյանին պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր, եւ Սահամյանն իրավունք ունեք սույն ծանուցագիրը ստանալու պահից մեկ ամսվա ընթացքում ներկայանալ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն՝ ծանոթանալու ուսումնասիրության նյութերին, ներկայացնելու դիրքորոշում, ինչպես նաև հայտարարագիր:
Նշենք, որ Արա Վարդանյանին մեղադրանք է առաջադրվել, գործը դատարանում է։ Ըստ մեղադրական եզրակացության՝ նա 2009 թվականի մայիսի 18-ից մինչև 2018 թվականի հուլիսի 20-ը զբաղեցնելով Հայաստանի Հանրապետության կողմից հիմնադրված «Հայաստան» համահայկական հիմնադրամի գործադիր տնօրենի պաշտոնը, շահադիտական նպատակներով իր պաշտոնեական դիրքը ծառայության շահերիին հակառակ օգտագործելով, էական վնաս է պատճառել հիմնադրամի ճրինական շահերին, ինչն առաջացրել է ծանր հետևանքներ, ինչպես նաև 2017-ից 2018 թվականներն ընկած ժամանակահատվածում պաշտոնեական կեղծիք կատարոլով՝ «ՀԱՏՄ» ՍՊԸ ընկերության տնօրեն Ավետիք Անուշավանի Հարությունյանի օժանդակությամբ յուրացնելու եղանակով հափշտակել է իր կառավարմանը վստահված հիմնադրամի առանձնապես խոշոր չափերի գույքը, այնուհետև կեղծված պաշտոնեական փաստաթղթերն այլ կեղծ փաստաթղթերով փոխարինելու նպատակով կատարել է պաշտոնեական նոր կեղծիք: Սույն գործով մեկ այլ մեղադրյալ էլ կա՝ Ավետիք Հարությունյանը։ Նրան մեղադրանք է առաջադրվել այ բանի համար, որ նա 2004 թվականի մարտի 22-ից հանդիսանալով Հայաստանի Հանրապետության կողմից հիմնադրված «Հայաստան» համահայկական հիմնադրամի 100% ղեկավարման հանձնված «ՀԱՏՄ» ՍՊ ընկերության տնօրենը, այսինքն՝ պաշտոնատար անձ, և ընդունելով հիմնադրամի գործադիր տնօրենի Արա Վարդանյանի՝ հանցանքի կատարման օժանդակելու առաջարկները, 2017-2018 թվականների ընթացքում շահադիտական նպատակներով պաշտոնեական կեղծիք կատարելով օժանդակել է Արա Վարդանյանի հիմնադրամի առանձնապես ծոշոր չափերի գույքը հափշտակելու, այնուհետև կեղծված պաշտոնեական փաստաթղթերն այլ կեղծ փաստաթղթերով փոխարինելու նպատակով անձնական այլ դրդումներով կատարել է պաշտոնեական նոր կեղծիք:
Հիշեցնենք, որ ԱԱԾ-ն 2019-ին հաղորդագրություն էր տարածել եւ նշել, որ Վարդանյանը բանկում գրավադրել է հիմնադրամի հաշվին գտնվող «Մոզիյան» ֆոնդի 28 մլն դրամ ավանդը և վարկային քարտով ստացել տարեկան 25 մլն դրամի վարկային գիծ: Այդ գումարն էլ օգտագործել է խաղադրույքներ կատարելու համար։ Բացի այդ, ըստ ԱԱԾ-ի, հիմնադրամի գործադիր տնօրենը հիմնադրամի` առանձնապես խոշոր չափերով գույքը յուրացնելու նպատակով տնտեսվարող կազմակերպություններից մեկի տնօրենի օժանդակությամբ կազմել, հաստատել և ստորագրել է Արցախի Հանրապետության շրջանների և Ստեփանակերտ քաղաքի հանրակրթական դպրոցներին ընդհանուր 292.833.540 ՀՀ դրամ արժողությամբ կահույք մատակարարելու վերաբերյալ կեղծ պայմանագրեր, հանձնման-ընդունման կեղծ ակտեր, որոնց հիման վրա հիմնադրամի հաշվից ընկերության ընթացիկ հաշվին փոխանցվել է առանձնապես խոշոր չափերի 292.833.540 ՀՀ դրամ, որն էլ փոխադարձ պայմանավորվածության համաձայն, յուրացման եղանակով, հափշտակվել է, իսկ Արցախի Հանրապետության շրջաններին և Ստեփանակերտ քաղաքի հանրակրթական դպրոցներին պայմանագրով նախատեսված գույքը չի մատակարարվել:
Ա․Վարդանյանը կալանավորվել էր, ապա գրավի դիմաց ազատ արձակվել։
