Հուլիսի 6-ին Ադրբեջանում Ռուսաստանի արտակարգ և լիազոր դեսպան Միխայիլ Եվդոկիմովը կանչվել է երկրի ԱԳՆ։ Տարածված հաղորդագրության համաձայն՝ հանդիպման ընթացքում կտրուկ բողոք է արտահայտվել հուլիսի 5-ի երեկոյան Ուկրաինայի Նիկոլաևի մարզում գտնվող SOCAR լցակայանի վրա անօդաչու թռչող սարքի հարձակման կապակցությամբ, համապատասխան նոտա է փոխանցվել ռուսական կողմին։
Հանդիպման ժամանակ հիշեցվել է, որ անօդաչու թռչող սարքի հարձակումն առաջին նմանատիպ միջադեպը չէ. SOCAR-ի օբյեկտներն Ուկրաինայում, այդ թվում՝ գազաբաշխման կոմպրեսորային կայանը և Օդեսայի նավթաբազան, նախկինում ենթարկվել են հարվածների և այլ ավերիչ ռազմական հետևանքների, որոնց արդյունքում զգալի նյութական վնասներ են եղել, ընկերության աշխատակիցներ են վնասվել։
Նշվել է, որ չնայած բազմաթիվ նախազգուշացումներին՝ նման միջադեպերի շարունակականությունը վկայում է հարձակումների նպատակային բնույթի մասին։ Հանդիպմանը նաև ընդգծվել են մի քանի ավիահարվածները, որոնք վնասել են Կիևում Ադրբեջանի դեսպանատան և Խարկովում պատվավոր հյուպատոսության շենքերը:
Ընդգծվել է Վիեննայի կոնվենցիաներին համապատասխան դիվանագիտական և հյուպատոսական առաքելությունների շենքերը պաշտպանելու պարտավորությունները խստորեն պահպանելու կարևորությունը։ Ռուսական կողմին կոչ է արվել համապարփակ հետաքննություն անցկացնել բոլոր նշված միջադեպերի վերաբերյալ, տրամադրել համապատասխան պարզաբանումներ և հետևել քաղաքացիական սեփականության ու դիվանագիտական առաքելությունների պաշտպանության միջազգային պարտավորություններին։
