«Քրեակատարողական հիմնարկների պայմանները շարունակաբար բարելավում ենք, Արթուր Օսիպյանի առողջական վիճակը գնահատվում է կայուն»:
Այս մասին ճեպազրույցի ընթացքում ասել է Արդարադատության նախարար Սրբուհի Գալյանը։
«Ես ամեն օր օպերատիվ կերպով տեղեկություններ եմ ստանում Արթուր Օսիպյանի առողջական վիճակի մասին։ Հենց երեկ նրան այցելել է մեր աշխատակիցը՝ Կենտրոնական մասից, նրան նաև առաջարկվել է հաղորդում ներկայացնել հանցագործության մասին այն իրողությունների վերաբերյալ, որոնք, իր կարծիքով առկա են, և որոնք իրենց բնույթով, իր կարծիքով, հանցավոր են»,- նշել է Գալյանը։
Նախարարի պնդմամբ՝ ամեն ինչ արվում է, որ անձի բոլոր իրավունքները պատշաճ ապահովվեն:
«Նրան տրամադրվում է իրեն հասանելի զբոսանքը, ամեն ինչ արվում է։ Ոչ մի միտում չպետք է փնտրել՝ կոնկրետ անձի հետ կապված վատ վերաբերմունքի»։
Հիշեցնենք, որ Արթուր Օսիպյանը երկու ամսով կալանավորվել է:
Ըստ իրավապահների՝ փաստական տվյալներ են ձեռք բերվել այն մասին, որ նա 2026 թվականի մարտի 22-ին տեղեկատվական և հաղորդակցական տեխնոլոգիաների օգտագործմամբ «Ֆեյսբուք»-ի իր օգտահաշվի միջոցով քաղաքական հայացքներով պայմանավորված շարժառիթով կատարել է հրապարակային գրառումներ՝ այդ կերպ ՀՀ վարչապետի հասցեին ուղղակի դիտավորությամբ հնչեցնելով բռնություն գործադրելու հրապարակային կոչեր:
Բացի այդ՝ Օսիպյանը, տեղեկանալով ՀՀ վարչապետի և «Քաղաքացիական պայմանագիր» կուսակցության այլ անդամների կողմից 2026 թվականի մայիսի 18-ին Արաբկիր վարչական շրջանում իրականացվելիք նախընտրական քարոզչության մասին, վերջիններիս նախընտրական քարոզչություն կատարելուն խոչընդոտելու նպատակով «Ֆեյսբուք»-ի իր անձնական օգտահաշվում հրապարակում կատարելուց հետո ժամանել է Արաբկիր վարչական շրջանի Վրացական 7 շենքի բակ և օգտագործելով քարոզչության հրապարակային բնույթը, տեղում հավաքված մեծաթիվ քաղաքացիների առկայությունը՝ խոչընդոտել է նախընտրական քարոզչության բնականոն ընթացքը:
Այնուհետև Արթուր Օսիպյանը հասարակության նկատմամբ դրսևորել է բացահայտ անհարգալից, իրավական ու բարոյական նորմերի նկատմամբ արհամարհական վերաբերմունք, այն է՝ հնչեցրել է հայհոյանքներ և անպարկեշտ արտահայտություններ՝ անտեսելով հավաքվածների կողմից համակեցության կանոնները հարգելու և պահպանելու հորդորները, խաթարել է հասարակական կարգը:
Քրեական վարույթի նախաքննության ընթացքում Օսիպյանի նկատմամբ հարուցվել է հանրային քրեական հետապնդում՝ Քրեական օրենսգրքի 330-րդ հոդվածի 2-րդ մասի 3-րդ կետով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը), 297-րդ հոդվածի 1-ին մասով (խուլիգանությունը) և 211-րդ հոդվածի 1-ին մասով (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը):
