Ծիծեռնակաբերդի հուշահամալիր այցելած Ֆրանսիայի նախագահ Էմանուել Մակրոնը այցից հետո ֆրանսերեն և հայերեն գրառումներ է կատարել սոցիալական ցանցերի իր հաշիվներում:
«Վերադարձ հիշողության և պարտականության այս վայր՝ անջնջելիին հանդիման, որպեսզի յուրաքանչյուր անուն արձագանք գտնի և մոռացության չմատնվի։
Ֆրանսիան հավերժ կանգնած է հայ ժողովրդի կողքին լի հարգանքով առ ապրած ցեղասպանության հիշատակը և խլված բազմաթիվ կյանքերը»,- գրել է նա այցից հրապարակած լուսանկարին կից:
Ավելի վաղ հայտնել էինք, որ Ֆրանսիայի Հանրապետության նախագահ Էմանուել Մակրոնը Հայաստանի Հանրապետության նախագահ Վահագն Խաչատուրյանի, Երևանի քաղաքապետ Տիգրան Ավինյանի, ԿԳՄՍ նախարար Ժաննա Անդրեասյանի և այլոց ուղեկցությամբ այցելել էր Ծիծեռնակաբերդի հուշահամալիր և հարգանքի տուրք մատուցել Հայոց ցեղասպանության զոհերի հիշատակին։
Նա և ՀՀ նախագահ Վահագն Խաչատուրյանը ծաղկեպսակներ էին զետեղել հուշահամալիրի պատին, ծաղիկներ խոնարհել անմար կրակի շուրջ: Նրանք շրջել էին հուշահամալիրի տարածքում, Ֆրանսիայի նախագահը գրառում էր կատարել հուշամատյանում:
