Երբ պատվիրված հարց եք տալիս, լավ կլինի մանրամասներին ծանոթանաք, որ անհարմար բան չստացվի:
Այս մասին սոցցանցի իր էջում գրել է Առողջապահության նախարար Անահիտ Ավանեսյանը՝ անդրադառնալով վարչապետ Նիկոլ Փաշինյանի ճեպազրույցի ժամանակ իր վերաբերյալ հնչած լրագրողի հարցին:
«ԱՆ Վ. Ա. Ֆանարջյանի անվան ուռուցքաբանության ազգային կենտրոնում ռադիոթերապիայի ծառայությունների 1 սեանսի արժեքը` որպես հիմնադիր, սահմանել ենք այս պահին 40.000 դրամ, մինչև նոր չափորոշիչների համաձայն գնահատման գործընթացը կավարտվի, և պետությունը կփոխհատուցի նոր գներով:
Մինչ այդ մենք, առաջնորդվելով պացիենտների շահերով, ավելի քիչ գումար ենք գանձում քաղաքացիներից. վա՞տ ենք անում:
Բացատրեմ. այս բուժծառայությունից օգտվող երկու խումբ կա` սոցիալական որևէ խմբի պատկանող և սոցխումբ չունեցող:
Սոցիալական խմբի պատկանող մեր քաղաքացիներին այս ծառայությունը տրամադրվում է ամբողջովին պետական պատվերով, քաղաքացու համար ամբողջովին անվճար և իր համար կարևոր չէ, թե պետությունն ինչքան է փոխհատուցում:
Համավճարով սպասարկվող քաղաքացիների դեպքում, առաջնահերթ համարելով քաղաքացու շահը, նվազ գին ենք սահմանել (20 000 դրամ` 32 000-ի փոխարեն, ինչպես մյուս կենտրոնում):
Ամո՛թ է, հերի՛ք է առանց հասկանալու պատվիրված տխմարություններ հնչեցնել:
Եթե մի օր որոշենք սոցիալական որևէ խմբի որևէ բուժծառայություն տրամադրենք ակցիայի շրջանակում, ինչը նորմալ պրակտիկա է, ասելու եք` հասե՛ք, փրկե՛ք, վճարովի ծառայություններն անվճար են տրամադրվում. ստացվում է` նախարարը սուտ է ասել:
Մենք պետական ազգային բժշկական կենտրոն ենք, և այո՛, մեզ համար էականը շահույթի գեներացումը չէ, այլ պացիենտի`մեր քաղաքացու շահը, և անհասկանալի է, թե ինչո՞ւ եք նեղվել, որ ավելի լավ բան ենք անում, քան ասե՞լ էինք»,- գրել է նախարարը:
