![]()
ՔԿ շենքից 590 հազար դոլարի հափշտակության գործի շրջանակներում Տնտեսական հանցագործությունների և մաքսանենգությունների քննության գլխավոր վարչության հինգերորդ վարչության պետի տեղակալ, համատեղությամբ՝ պետի պաշտոնակատար Գոռ Թադևոսյանն ազատվել է զբաղեցրած պաշտոնից:
Այս մասին «Հայկական ժամանակ»-ին հայտնել են Քննչական կոմիտեից՝ տեղեկացնելով նաև այլ ազատումների և նշանակումների մասին:
Հինգերորդ վարչության պետի պարտականությունները վերապահվել է Հայկ Կատվալյանին:
Չորրորդ վարչության պետ Վահան Ամիրխանյանն ազատվել է զբաղեցրած պաշտոնից:
Չորրորդ վարչության պետի պարտականությունները վերապահվել է Դավիթ Մանուչարյանին:
Առաջին վարչության պետ Ռաֆայել Ղամբարյանը ազատվել է զբաղեցրած պաշտոնից:
Առաջին վարչության պետի պարտականությունները վերապահվել է Բենիամին Հարությունյանին:
![]()
Ավելի վաղ հայտնել էինք, որ ՀՀ հակակոռուպցիոն կոմիտեում նախաձեռնվել է քրեական վարույթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության՝ Երևան քաղաքի Դեղատան 3 հասցեում գտնվող վարչական շենքից առանձնապես խոշոր չափերով գումար հափշտակելու դեպքի առթիվ։
ՔԿ-ն հայտնել էր, որ բացահայտվել են տևական ժամանակ նախապատրաստված և մանրակրկիտ պլանավորված հափշտակության դեպքը, խմբի անդամների ինքնությունները, նրանց դերաբաշխումները, ինչպես նաև հափշտակության մեխանիզմն ու գումարի պահման վայրերը, հայտնաբերվել է հափշտակված 590.000 ԱՄՆ դոլար գումարի մեծ մասը՝ 578․800 ԱՄՆ դոլարը:
![]()