Ռուսաստանը և Ուկրաինան գերիների ամենամեծ խմբի փոխանակումն են կատարել, այն տևել է 3 օր. լուսանկարներ

 

Ռուսաստանն ու Ուկրաինան ավարտել են 1000-ը 1000-ի դիմաց գերիների փոխանակումը, հաղորդում են ռուսական և ուկրաինական աղբյուրները։

Փոխանակումը տևել է երեք օր։ Մայիսի 25-ին՝ կիրակի օրը, երկու կողմերը փոխանակել են 303 մարդ։

Եռօրյա 1000-ը 1000-ի դիմաց փոխանակումը վեցերորդն էր այս տարի և 65-րդը՝ Ուկրաինա ռուսական լայնամասշտաբ ներխուժումից հետո, ըստ Ռազմագերիների բուժման ուկրաինական համակարգող շտաբի:

 

Ընդհանուր առմամբ, 2022 թվականի մարտից սկսած բանակցային գործընթացի և փոխանակումների շրջանակում Համակարգող շտաբն ազատ է արձակել 5757 Ուկրաինայի քաղաքացիների։ Եվս 536 ուկրաինացի վերադարձվել է առանց փոխանակման։

«Ազատ արձակված գերիները կստանան անհրաժեշտ բժշկական օգնություն և վերականգնում, ինչպես նաև անազատության մեջ անցկացրած ժամանակի համար դրամական նպաստի և միանվագ դրամական օգնության բոլոր վճարումները:

 

Ուկրաինան կապահովի, որ ազատ արձակվածները վերաինտեգրվեն հասարակությանը ռուսական գերության մեջ երկարատև մեկուսացումից հետո», — ասվում է շտաբի հաղորդագրության մեջ:

 

Համակարգող շտաբի Telegram ալիքում ասվում է, որ ազատ են արձակվել ռազմածովային ուժերի, ռազմաօդային ուժերի, օդադեսանտային գրոհայինների, տարածքային պաշտպանության, ինչպես նաև Ազգային գվարդիայի, Պետական սահմանային ծառայության և Պետական հատուկ տրանսպորտային ծառայության զինծառայողները։ Նրանց թվում են Մարիուպոլի 70 պաշտպաններ։

 

Փոխանակման ավարտի մասին հայտարարել է նաև ՌԴ պաշտպանության նախարարությունը։ «Մայիսի 25-ին Կիևի ռեժիմի կողմից վերահսկվող տարածքից վերադարձվել է ևս 303 ռուս զինծառայող, որի դիմաց Ուկրաինայի զինված ուժերի 303 ռազմագերի է տեղափոխվել:

Բոլոր ռուս զինվորականները և քաղաքացիական անձինք կտեղափոխվեն Ռուսաստանի Դաշնություն՝ ՌԴ պաշտպանության նախարարության բուժհաստատություններում բուժման և վերականգնման նպատակով»,- ասվում է նախարարության հաղորդագրության մեջ։

 

Ինչպես հայտնում է Интерфакс-ը՝ վկայակոչելով պաշտպանության նախարարության տվյալները, ռուս զինվորականներն այս պահին գտնվում են Բելառուսի տարածքում, որտեղ նրանց հոգեբանական և բժշկական օգնություն է ցուցաբերվում։

Նախօրեին կողմերը փոխանակել էին 307-ական հոգի։

 

«Մեր 1000 մարդկանց ռուսական գերությունից ազատելու պայմանավորվածությունը Թուրքիայում հանդիպման գրեթե միակ իրական արդյունքն էր»,- հինգշաբթի՝ մայիսի 22-ին, առաջին փոխանակումը մեկնաբանելիս գրել է Վլադիմիր Զելենսկին։

 

Մայիսի 16-ին ուկրաինական և ռուսական պատվիրակությունները 2022 թվականից ի վեր առաջին անգամ Ստամբուլում հանդիպել և ուղիղ բանակցություններ էին վարել։ Զրույցը տևել էր մոտ երկու ժամ։

 

Ռուսական պատվիրակությունը գլխավորում էր ՌԴ նախագահի օգնական Վլադիմիր Մեդինսկին, իսկ ուկրաինական պատվիրակությունը՝ պաշտպանության նախարար Ռուստեմ Ումերովը։

CNN-ը հայտնել է, որ փոխանակման հարցը բարձրացրել է թուրքական կողմը, երբ բանակցությունները սկսել են փակուղի մտնել։

Հանդիպումից հետո Ումերովը խոսել է «1000-ը 1000-ի դիմաց» գերիների փոխանակման համաձայնագրի մասին։ Այս տեղեկությունը հետագայում հաստատվել է Ռուսաստանում։

Կողմերը քննարկել են նաև նախագահներ Զելենսկու և Պուտինի հանդիպման հնարավորությունը։ Այնուամենայնիվ, չնայած շարունակվող հաղորդագրություններին, այստեղ հեռանկարները դեռևս պարզ չեն:

 

Վատիկանը հայտարարել է Ռուսաստանի և Ուկրաինայի միջև ուղիղ բանակցությունների երկրորդ փուլն անցկացնելու ցանկության մասին։ Դա հաստատել է նորընտիր Հռոմի պապ Լևոն 14-ը, ով անձամբ հանդիպել է Վլադիմիր Զելենսկիի հետ իր երդմնակալության օրը:

Որպես հանդիպման այլ հնարավոր վայրեր քննարկվել են Շվեյցարիան և կրկին Թուրքիան:

 

Loading

Մի մոռացեք կիսվել Ձեր ընկերների հետ