![]()
Վերջին օրերի ընթացքում Հայաստանում համաճարակային իրավիճակը շարունակում է լարված մնալ։ Առողջապահության նախարարության բժշկական օգնության քաղաքականության վարչության պետ Քնար Ղոնյանը մեր հարցմանն ի պատասխան՝ ասաց՝ մարտի 29-ի դրությամբ հիվանդանոցային պայմաններում կորոնավիրուսի դեմ բուժում է ստանում 2130 պացիենտ, նրանցից 893-ի վիճակը գնահատվում է ծանր, ծայրահեղ ծանր վիճակում են 215-ը, թոքային օդափոխման սարք է միացված 64 պացիենտի:
Առողջապահության նախարարությունը ավելացրել է վերապրոֆիլավորված հիվանդանոցների թիվը։ Եթե նախորդ օրերին ամբողջովին և մասնակի վերապրոֆիլավորված 14 հիվանդանոց էր ընդունում քովիդով հիվանդներին, ապա այսօր դրանք արդեն 19-ն են։ Ղոնյանի խոսքով՝ ելնելով համաճարակային իրավիճակից և հիվանդանոցային պայմաններում բժշկական օգնության և սպասարկման կարիք ունեցող կորոնավիրուսային հիվանդությամբ պացիենտների թվաքանակից՝ նախարարությունը նախատեսում է այլ հիվանդանոցների շարունակաբար ամբողջությամբ կամ մասնակի վերապրոֆիլավորումը։
Քովիդով հիվանդներին ընդունող՝ ամբողջովին և մասնակի վերապրոֆիլավորված հիվանդանոցներ են գործում Երևանում, Կապանում, Մարտունիում, Վանաձորի ԲԿ-ն, Ապարանի և Սպիտակի բժշկական կենտրոնները։ Գյումրիում դրանք երկուսն են՝ Գյումրու ինֆեկցիոն հիվանդանոցը եւ Գյումրու բժշկական կենտրոնը,
Այս պահի դրությամբ սոմատիկ հիվանդների համար նախատեսված 1984 մահճակալներից զբաղված է 183-ը։ Վերակենդանացման 304 մահճակալներից զբաղված է 299-ը։ Թթվածնային կետով կամ կոնցենտրատով մահճակալները 1584-ն են, որից այժմ զբաղված է 1506-ը։
Առողջապահության նախարարության բուժօգնության քաղաքականության վարչության պետի խոսքով՝ 2020 թվականի դեկտեմբեր ամսին հիվանդանոցային պայմաններում կորոնավիրուսային հիվանդությամբ պացիենտների բուժման գործընթացում ներգրավված է եղել շուրջ 30 բժշկական կազմակերպություններ շուրջ 3000 ընդհանուր մահճակալային ֆոնդով, որից շուրջ 380-ը՝ վերակենդանացման մահճակալներ: Համավարակի պիկի ժամանակ կորոնավիրուսային հիվանդությամբ պացիենտների բժշկական օգնությունը և սպասարկումն իրականացնող կազմակերպություններում թթվածնային կետով կամ/և կոնցենտրատրով ծավալված մահճակալների թիվը կազմել է շուրջ 2000:
Ընդհանուր առմամբ Հայաստանում մինչև այժմ հաստատվել է կորոնավիրուսային հիվանդության 190 հազար 741 դեպք, որից 172 հազար 96-ը առողջացել են, մահացել է 3476-ը։ Երեկ կատարված 3978 թեստավորումից հաստատվել է հիվանդության 424 նոր դեպք։ Նույն օրվա տվյալով՝ առողջացել է 590-ը, մահվան դեպքերը 12-ն են։
![]()