Ծննդաբերական բաժանմունք՝ առանց ծնունդների

Մարալիկի առողջության կենտրոնի ծննդաբերական բաժանմունքի փակման հարցը մնում է օրակարգում արդեն 5 տարի։ Հստակեցումներն ու որոշումներն այս ուղղությամբ հետաձգվում են, իսկ հետևանքները ավելի խորանում։ Մեկ տարի է՝ բաժանմունքի 13 աշխատակիցներ աշխատավարձ չեն ստացել, իսկ առողջության կենտրոնի տնօրենը՝ առանց իրավական հիմքի, բուժանձնակազմին աշխատանքից ազատել չի կարող:

«2020-ի ծնունդները արտակարգ իրավիճակում ընդունած ծնունդներ են եղել։ Եկել են ծննդաբերական ակտ սկսված, ի՞նչ պիտի անեինք, պիտի բացատրագրերով, ոստիկանով ընդունեինք ծնունդը, թե չէ՝ ո՞վ պիտի պատասխանատվություն կրեր մոր և երեխայի համար, նման իրավիճակում մենք 46 ծնունդ ունեցանք։ Բայց ենթադրենք, դրանց ավելանար ևս 50 ծնունդ նման դեպքերով, միևնույն է՝ մենք 150-ի շեմին չէինք հասնի»,- SHANTNEWS.am-ի հետ զրույցում ասել է Մարալիկի առողջության կենտրոնի տնօրենի ժամանակավոր պաշտոնակատար Անուշ Հովսեփյանը։

2018 թվականին, երբ փոխվեցին ծննդօգնության չափորոշիչները, 2 տարվա ընթացքում Մարալիկի ծննդաբերական բաժանմունքի ներկայացրած ծրագրերն ու առաջարկներն, ըստ էության, հիմք չհանդիսացան, որ այն առաջին մակարդակի ծննդատների պահանջներին բավարարեր։ Առաջին մակարդակի ծննդատների տարեկան նվազագույն ծնունդը 150-ն է համարվում։ Մարալիկի ծննդատունը, որը սպասարկում է տարածաշրջանի 17 համայնքների, 2 տարի է՝ ծնունդների նման թիվ չի ունենում: 2019-ին՝ 102, 2020-ին՝ ընդամենը 46 ծնունդ։

Ինչպես 2020-ին էր, հիմա էլ՝ 2021-ին, ծննդօգնության ծառայության համար պետպատվեր Մարալիկի առողջության կենտրոնին չի հատկացվել։ Արդեն 4 տարի է, որ կենտրոնի ծննդաբերական բաժանմունքի փակման հարցը նախարարության օրակարգում է, բայց առանց հստակեցումների ու որոշման հիմքերի։ Ծննդաբերական բաժանմունքը տեղափոխվեց առողջության կենտրոնի վերանորոգված հատված, առանձին անհատների ու կազմակերպությունների ներդրումներով անհրաժեշտ բուժսարքավորումներ են կենտրոնացրել, բայց շենքային ու սարքավորումային պայմանները ծննդօգնության կազմակերպմանը չեն նպաստել, քանի որ չունեն նեղ մասնագետներ։

Ծննդաբերականի 13 հոգանոց բուժանձնակազմից հերթով 3-ն են աշխատանքի գալիս, այսինքն՝ հերթապահում են, բայց օրերով ծնունդներ չեն ունենում, աշխատում են առանց աշխատավարձի։ Մարալիկի առողջության կենտրոնը աշխատավարձային ու այլ պարտքեր չունի, ֆինանսական ճեղքվածքը միայն ծննդաբերական բաժանմունքինն է։ Ինչպես են խնդիրը կարգավորելու, հարցի պատասխանը տնօրենն էլ չունի:

«Պետությունը մեզ ծնունդների համար վճարել է, որն էլ ես բաժանել եմ աշխատողների մեջ։ Հիմա սպասում ենք կառավարության որոշմանը, երբ ստույգ ունենամ իրավական հիմքը, մարդկանց նոր կարող եմ ազատել աշխատանքից, իսկ նման դեպքում, երբ աշխատանքից ազատված չեն, մենք ունենք պարտքեր՝ 15 մլն դրամի կարգի, ոնց ու ով է փակելու այդ պարտքը, ես դա չգիտեմ»,- նշել է կենտրոնի տնօրենը։

Մարալիկի ծննդատան լուծարման կամ գուցե այլ կարգավիճակով գործունեություն ունենալու հստակ որոշման պատասխան Շիրակի մարզպետարանի առողջապահության վարչությունն էլ չունի։

Անի խոշորացված համայնքի 17 գյուղեր սպասարկող ծննդաբերական բաժանմունքը վերջին տարիներին միայն ծննդաբերությունների թվի նվազում է արձանագրում, բայց դա ծնելիության ցուցանիշի հետ կապ չունի։ Այժմ կենտրոնի պոլիկլինիկ ծառայությունում 82 հղի է հաշվառված, որոնք պատրաստվում են ծննդաբերել մարզի մյուս ծննդատներում։

Loading

Մի մոռացեք կիսվել Ձեր ընկերների հետ