ՀՀ ԵԿՄ վարչության նախագահ Սասուն Միքայելյանն ուղերձ է հեղել Արցախի Հանրապետության օրվա առթիվ:
«Սիրելի՛ արցախահայություն, ՀՀ Երկրապահ կամավորականների միության եւ վարչության անունից շնորհավորում եմ բոլորիս Արցախի Հանրապետության կարեւորագույն տոներից մեկի՝ Անկախության օրվա առթիվ: Անկախությունն ու ազատությունը հեշտ չի տրվում. Արցախն էլ այսօր ազատ ու անկախ պետություն է նվիրյալ հայորդիների, համայն հայության միասնության շնորհիվ: Մենք փառքով ենք անցել Արցախի անկախության համար պայքարի ճանապարհը:
Փա՛ռք Արցախի ազատագրման համար նահատակված հայորդիներին,
Փա՛ռք արցախահայությանը,
Փա՛ռք Երկրապահին, հերոս մայրերին,
Փա՛ռք մեր բանակին, բոլոր զինվորներին, ովքեր ամեն օր հայրենիք են պաշտպանում,
Փա՛ռք Հայաստան, Արցախ, Սփյուռք եռամիասնությանը:
Սպարապետ Վազգեն Սարգսյանն էր ասում. «Անկախությունը քննարկվող արժեք չէ», եւ իսկապես անկախությունը չեն քննարկում, անկախությունը պահում են, պետությունը հզորացնում: Արցախը ակնհայտ հզորանում է, արցախցին շենացնում է իր տունը: Երկրապահն էլ հպարտ է Հայաստան եւ Արցախ պետություններով, նորանոր ձեռքբերումներով, հաջողություններով:
Սիրելի՛ հայրենակիցներ,
Եվս մեկ անգամ շնորհավորում եմ, մաղթում խաղաղություն, նորանոր ձեռքբերումներ:
Կեցցե՛ ազատ Արցախի Հանրապետությունը,
Կեցցե՛ մեր միասնությունը, որի շնորհիվ կերտում ենք մեր բարեկեցիկ ապագան»,-նշվում է Սասուն Միքայելյանի ուղերձում:
