Առողջապահության նախարար Արսեն Թորոսյանի «Ֆեյսբուքի» անձնական և պաշտոնական էջերն ապաակտիվացված են:
Այդ փաստի ֆոնին լուր տարածվեց, թե նախարարը հրաժարական է ներկայացրել: Սակայն ՀՀ վարչապետի մամուլի խոսնակ Մանե Գևորգյանը SHANTNEWS.am-ի հետ զրույցում հերքեց Թորոսյանի հրաժարականի մասին լուրը.
«Նման բան չկա, ապատեղեկատվություն է»,- ասաց Գևորգյանը:
Հիշեցնենք, որ ՀՀ առողջապահության նախարար Արսեն Թորոսյանի ֆեյսբուքյան պաշտոնական էջն այլեւս հասանելի չէ, ավելի վաղ նախարարը փակել էր նաեւ ֆեյսբուքյան անձնական էջը:
Մեզ հետ զրույցում առողջապահության նախարարի մամուլի քարտուղար Ալինա Նիկողոսյանը հրաժարվեց մեկնաբանել, թե ինչու էջերն այլեւս հասանելի չեն: Նա միայն նշեց, որ նախարարի ֆեյսբուքյան անձնական էջը շուրջ 5 ամիս է՝ փակված է:
Նիկողոսյանը նաեւ չպատասխանեց այն հարցին, թե էջերը փակելն արդյոք կարո՞ղ է կապ ունենալ Երեւանի «Սուրբ Գրիգոր Լուսավորիչ» բժշկական կենտրոնի նախկին տնօրեն Արա Մինասյանի դատական հայցի հետ:
Հիշեցնենք, որ Երեւանի ընդհանուր իրավասության դատարանը բավարարել էր Արա Մինասյանի հայցն ընդդեմ Թորոսյանի ու նախարարության՝ պարտավորեցնելով Թորոսյանին ներողություն խնդրել ու հերքել զրպարտություն համարվող տվյալները: Վճռաբեկ դատարանն այդ որոշումը թողել էր անփոփոխ:
Վերոնշյալ ԲԿ-ի տնօրենը պաշտոնից ազատվել էր 2018 թվականին՝ հաստատությունում իրականացված ուսումնասիրություններից հետո: Թորոսյանը հայտնաբերված չարաշահումներին անդրադարձել էր ֆեյսբուքյան ուղիղ եթերով՝ այն վերնագրելով «Տուշոնկեքի մասին»:
«Մենք ստուգում ենք 2016-2017 թթ. եւ 2018-ի մի մասը, պատկերացրեք՝ եթե ավելի հետ գնանք, ապա այդ գումարները արդեն հարյուրավոր միլիոններով արդեն չեն հաշվարկվի, կազմակերպված խմբակային հանցավորություն է, ոչ թե սովորական, ու այդ կազմակերպված հանցավորության բանդայի մի մասը հիմա ցույց է անում, որ բանդայի պարագլուխը չզրկվի իր աթոռից»,- իր խոսքում նշել էր նա:
Դրանից հետո Մինասյանը քաղաքացիական հայց էր ներկայացրել դատարան՝ պահանջելով, որ հերքվեն Թորոսյանի հրապարակային արտահայտությունները:
Առողջապահության նախարարը, սակայն, այդպես էլ ներողություն չխնդրեց: Ավելի վաղ իր ֆեյսբուքյան ուղիղ եթերում նշել էր, որ ինչ ասել էր նախորդ ուղիղ եթերի ժամանակ, կրկնում է ու նորից կասի՝ մեր դատական համակարգը չի վայելում ժողովրդի մեծամասնության համակրանքը եւ կարիք ունի բարեկարգումների:
