Ռուսաստանը միշտ Հայոց ցեղասպանությունն ընկալել է որպես սեփական ցավ ու դժբախտություն:
Այս մասին հերթական ամենշաբաթյա ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան։
«Ապրիլի 24-ը Օսմանյան կայսրությունում Հայոց ցեղասպանության հերթական տարելիցն է։ Այս ողբերգական օրը հսկայական պատմական, հոգևոր, բարոյական և քաղաքական նշանակություն ունի մեր դաշնակից Հայաստանի, այդ հանրապետության բարեկամ ժողովրդի, Ռուսաստանում բազմամիլիոնանոց հայկական սփյուռքի համար։ Մենք միշտ ընկալել ենք այս ողբերգությունը որպես մեր սեփական ցավ ու դժբախտություն»,- ասել է Զախարովան։
Նրա խոսքով, Մոսկվան առաջիններից էր, որ հայտարարել է ցեղասպանության պաշտոնական ճանաչման մասին։ Նախօրեին Ռուսաստանի բազմաթիվ քաղաքներում հիշատակի միջոցառումներ են անցկացվել։