Անտառային էկոհամակարգերի պահպանության և անտառների առողջ վիճակի ապահովման նպատակով 2026 թվականի հունիսի 8-ից Վայոց ձորի, Հրազդանի և Արագածոտնի մարզերում գտնվող «Անտառտնտեսություն» մասնաճյուղերի անտառածածկ տարածքներում մեկնարկել են անտառային վնասատուների և հիվանդությունների դեմ պայքարի օդային կենսաբանական միջոցառումները։
Միջոցառումներն իրականացվում են շրջակա միջավայրի նախարարության «Հայանտառ» ՊՈԱԿ-ի կողմից։ Ուղղաթիռի միջոցով նպատակային մշակման են ենթարկվում շուրջ 9000 հեկտար անտառային տարածքներ, որոնք վարակվել են տերևակեր վնասատուներով։
Կիրառվում են շրջակա միջավայրի համար անվտանգ կենսաբանական պատրաստուկներ, որոնք նախատեսված են վնասատուների տարածումը սահմանափակելու և անտառային էկոհամակարգերի կենսաբանական հավասարակշռության պահպանմանը նպաստելու համար։
Անտառներին հարակից համայնքների բնակիչները, անտառային տարածքներում մեղվաընտանիքներ ունեցող անձինք նախապես իրազեկվել են կենսաբանական միջոցառումների անցկացման և այդ ընթացքում անվտանգության պահանջների պահպանման վերաբերյալ։
Ըստ նախատեսածի՝ աշխատանքները կշարունակվեն մինչև հունիսի 30-ը։
Կենսաբանական պայքարի մեթոդների կիրառումը համարվում է անտառների պաշտպանության արդյունավետ և բնապահպանական առումով պատասխանատու գործիք․ այն հնարավորություն է տալիս նվազեցնել վնասատուների պատճառած վնասը՝ միաժամանակ պահպանելով անտառային կենսաբազմազանությունը և բնական միջավայրի կայունությունը։
