Հովհաննես Թումանյանի անվան Ազգային տիկնիկային թատրոնի գեղարվեստական ղեկավար Ռուբեն Բաբայանը կարծում է, ռուսական ուղղությունը նախընտրող ուժերը առաջնորդվում են Ռուսաստանի շահերով՝ օգտագործելով Հայաստանը:
Նրա խոսքով՝ այս ուժերը հույսը կապում են ոչ թե ընտրությունների, այլ հետընտրական զարգացումների հետ. «Այն, ինչ ժողովրդավար է, ուղղված է ՌԴ-ի դեմ, և ՌԴ-ն մտածում է՝ այս հողն իրենն է: Դեպի Ռուսաստան գնալ քարոզողները չե՞ն տեսնում, որ այսօր ՌԴ-ն դարձել է «изгой» երկիր»:
Միաժամանակ նա նկատում է. «ՌԴ-ից ասում են՝ մեզ համար ոչ այնքան կարևոր է՝ ինչպես կանցնեն ընտրությունները, այլ, թե ով չի դառնա վարչապետ»:
Ըստ Բաբայանի՝ Ռուսաստանը մշտապես փորձում է վախի մեջ պահել, թե «մենք չլինենք, ձեզ կուտեն, կսպանեն»: Այս համատեքստում նա ասում է. «Վերջին 200 տարվա սպանությունները պայմանավորված են նրանով, թե ում վրա ենք հույս դրել որպես փրկիչ»:
Արվեստագետի դիտարկմամբ՝ Ռուսաստանն այնքան է շահարկելու Ղարաբաղի հարցը, որ ստեղծի ռազմական կոնֆլիկտ Հայաստանի և Ադրբեջանի միջև. «Որ էլի գա «փրկի» հային, ամրացնի սապոգը: Խաղաղություն նշանակում է ՌԴ-ի բացակայություն, իսկ ՌԴ-ի ներկայությունը՝ պատերազմ»:
Զրուցակիցը ընդգծում է. «Եթե չենք ընդունում, որ մեր տարածքը այսքան է, ուրեմն պետք է լինենք ինչ-որ մեկի գաղութը և նարդի խաղալիս հրճվանքով հիշենք, թե Մեծ Հայքի քարտեզը այսքան է եղել»:
Անդրադառնալով հունիսի 7-ին սպասվող խորհրդարանական ընտրություններին՝ նա ասում է. «Այս ընտրությունները շատ ճակատագրական են, պետք է որոշենք՝ կլինե՞նք անկախ պետություն, թե՞ գաղութ»:
Առավել մանրամասն՝ «Հայկական ժամանակ»-ի հետ հարցազրույցում:
