«Ինչպես որ Ադրբեջանն է կապ ստանում Նախիջևանի հետ, այդ նույն փոխադարձ առավելություններով Հայաստանը կապ է ստանում նախ՝ ինքն իր հետ, որովհետև, օրինակ, Կապանը և Մեղրին երկաթուղային կապ չունեն Երևանի հետ՝ Սյունիքով և Վայոց ձորով, դա սովետական ժամանակաշրջանում եղել է Նախիջևանով»,:
Այս մասին Հանրային հեռուստաընկերության եթերում Պետրոս Ղազարյանի հետ հարցազրույցում ասել է ԱԺ փոխնախագահ Ռուբեն Ռուբինյանը՝ անդրադառնալով Վաշինգտոնում ՀՀ-ի և Ադրբեջանի միջև կնքված համաձայնագրին։
Ռուբինյանի խոսքով՝ դրանով նաև Հայաստանը ստանում է կապ երրորդ երկրների հետ:
«Երեկ թիվ մեկ քննադատությունը հետևյալն էր․ ասում էին՝ մենք Ադրբեջանին տալիս ենք տրանսպորտային կապ, բայց մենք մնում ենք շրջափակման մեջ, ՀՀ-ի համար ոչինչ չի բացվում: Սուտ է դա։ Պետք է բացել երեկ ստորագրված հռչակագրի տեքստը և հասկանալ, որ Հայաստանի համար տրանսպորտային կապը՝ Ադրբեջանի տարածքով, բացվելու է»,- մանրամասնել է Ռուբինյանը:
Հիշեցնենք՝ օգոստոսի 8-ին Վաշինգտոնում՝ Սպիտակ տանը ստորագրվել է Ադրբեջանի Հանրապետության նախագահի, Հայաստանի Հանրապետության վարչապետի և Ամերիկայի Միացյալ Նահանգների նախագահ Դոնալդ Թրամփի համատեղ Հռչակագիրը:
Վարչապետը հրապարակել է հռչակագրի տեքստը։
Խաղաղության համաձայնագիրը Հայաստանի և Ադրբեջանի միջև օգոստոսի 8-ին նախաստորագրվել է, ինչը նշանակում է, որ կողմերը պաշտոնապես և գրավոր կերպով արձանագրել են, որ այդ փաստաթուղթը իրենց համար ընդունելի է և, ըստ էության, արդեն անփոփոխելի։
