Խի՞ ես անիծում, տղա ջան, առավոտից իրիկուն անեծք են տալիս. եկեղեցու երկու «գեներալ» նստած է. տեսանյութ

Ազգային ժողովի «Քաղաքացիական պայմանագիր» խմբակցության պատգամավոր, Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի խոսքով՝ վարչապետ Նիկոլ Փաշինյանի վերջին միջազգային այցերի առանցքում հիմնականում անվտանգային հարցերն են եղել: Նրա խոսքով՝ թույլատրելի սահմանում ներկայացվել են դրանք:

Միաժամանակ Քոչարյանը նկատում է, որ ընդդիմադիր տարբեր գործիչներ և լրատվամիջոցներ շարունակում են հիբրիդային խարդավանքների իրենց ծրագիրը՝ ասելով և գրելով այն, ինչ իրենց ճաշակով է. «Այսինքն՝ մեծ մասը գոյություն չունեցող բաներ են»:

Պատգամավորի նկատառմամբ՝ սա արվում է, որպեսզի ժողովրդի մեջ խորացնեն անվստահությունն իշխանության վարած քաղաքականության և քայլերի նկատմամբ:

«Շատ ուժերի ձեռք չի տալիս, որ խաղաղության օրակարգը դառնա իրականություն: Այն ուժերը, որոնք չունեն ասելիք, նրանց միակ գործը իշխանությունների արածը վարկաբեկելն է դարձել: Ինչքան ուզում են, թող վարկաբեկեն: Ասում են՝ իշխանությունները կոռուպցիայի մեջ են, բայց ցույց չեն տալիս, թե որտեղ է այդ կոռուպցիան: Հիփոթեքից բացի՝ այլ բան չեն կարողանում ասել»,- նկատում է Քոչարյանը:

Անդրադառնալով այն պնդումներին, թե իշխանությունը պատրաստվում է «միջանցքը» զիջել՝ իշխող ուժի անդամն ասում է. «Մի ֆիլմ կա՝ 01 99, ասում է՝ վերջը դու մեքենայի տակ ընկել ես, ասում է՝ չէ, ասում է՝ ո՞նց, չե՞ս ընկել, ասում է՝ нет: Հիմա որքան էլ հերքում ենք, որ միջանցք տալու հարց չկա, ընդդիմությունը նույն բանն է ասում: Ջուրը չընկած՝ սկսում են ղժղժոցներ հանել»:

Իսկ ինչ վերաբերում է արտապատվիրակմանը, Քոչարյանը պարզաբանում է. «Դա տարբերակ է, որը կարող է քննարկվել»:

Արձագանքելով դիտարկմանը, որ միլիարդատեր, կալանավորված Սամվել Կարապետյանը հայտարարել է նոր ուժ ստեղծելու մասին՝ վերջինս ասում է՝ «նոր ուժ՝ հին դեմքերով»:

«Ռուսական օլիգարխիան կամ մի քանի անձնագիր ունեցող անձնավորությունը գալիս ասում է՝ ես պետք է որոշեմ Հայաստանի ժողովրդի ճակատագիրը: Ռուբեն Վարդանյանն էլ գնաց Արցախ, որ այնտեղից հետ գա, պարզապես դեպքերը այլ կերպ զարգացան»,- նկատում է պատգամավորը:

Քոչարյանը հիշեցնում է՝ Կարապետյանի տան խուզարկության օրը նրա եղբայրը՝ Կարեն Կարապետյանը, «ցուցմունք» է տվել՝ ասելով, որ իրենց փողերով է կառուցվել Սևանի կառավարական առանձնատունը. «Սա բարեգործությո՞ւն է, դրա դիմաց ի՞նչ է ստացել ձեր ընտանիքը. սրա պատասխանը պետք է տրվի»:

Անդրադառնալով հարցին, թե ինչպես ստացվեց, որ Լևոն Տեր-Պետրոսյանը, որը Ռոբերտ Քոչարյանի և Սերժ Սարգսյանի իշխանությունների դեմ էր պայքարում, այսօր կարծես դարձել է նրանց համախոհը, Անդրանիկ Քոչարյանն ասում է. ««Հայ ազգային կոնգրես»-ը չի կարողանում ներել Նիկոլ Փաշինյանին, որ իրականացրել է հեղափոխություն և ճանապարհել է մարդկանց, որոնց Կոնգրեսի ղեկավարը բնութագրում էր մոնղոլ-թաթար: Շատերը փոխանակ զբաղվեն քաղաքականությամբ, զբաղված են քարկտիկ խաղալով»:

Ըստ պատգամավորի՝ Հայ առաքելական եկեղեցու վերնախավը պետք է վերանայի իր բոլոր մոտեցումները և շարժվի եկեղեցական կանոնադրության ընթացակարգով:

«Առավոտից իրիկուն անեծքներ են տալիս: Ա՛յ տղա ջան, խի՞ ես անիծում մեզ. չէ՞որ կարող է դու անիծում ես մարդկանց, որոնք վաղը կարող է քեզ փրկեն: Եկեք անիծենք, տենանք՝ ուր ենք հասնում»,- ասում է նա՝ հիշեցնելով. «Եկեղեցու երկու բարձրաստիճան «գեներալներ» նստած են շատ ծանր հոդվածով»:

Առավել մանրամասն՝ «Հայկական ժամանակ»-ի հետ հարցազրույցում:

Loading

Մի մոռացեք կիսվել Ձեր ընկերների հետ