Երևանի քաղաքապետ Տիգրան Ավինյանը արձագանքել է մայրաքաղաքում առատ տեղումներին պատրաստ լինելու մասին զեկույցին:
«Ձյան տեղումների մասին խոսել ենք բազմիցս․ խցանումների երևի 80 տոկոսը պայմանավորված էր ամառային անվադողերով ավտոմեքենաներով ԱՊՊԱ-ների հետևանքով: ԱՊՊԱ-ներն առաջանում էին հիմնականում ամառային անվադողերով դուրս եկած ավտոմեքենաների մոտ, չնայած այլևս տեղ չէր մնացել, որտեղով որ հայտարարություն չէր տարածվել, որ Երևանում առատ տեղումներ են սպասվում: Մյուս խնդիրը ԱՊՊԱ համակարգի տրամաբանությունն է, որ՝ եկեք իրար թեթև քսելու պատճառով ժամերով սպասենք և ստեղծենք կիլոմետրանոց հերթեր։
Մարդիկ մեղավոր չեն։ Այո, գուցե մեղավոր են, որ ամառային անվադողերով են դուրս եկել փողոց, այդ հանգամանքը եթե հաշվի առնվի, հարց պետք է առաջանա՝ արդյոք պետք է փոխհատուցվեն մեքենաները, թե ոչ, բայց այդ համակարգը Երևանի համար աղետ է․ իրար թեթև քսված ավտոմեքենաները ժամերով երթևեկությունը կանգնեցնում են»,- ասաց նա։
Ըստ նրա՝ դա խնդիր է ստեղծել նաև քաղաքապետարանի տեխնիկայի համար, որն այդ կարևոր ժամերին պետք է հասներ համապատասխան վայրեր՝ աղ ու ավազ ցանելու։ Քաղաքապետը տեղեկացրեց, որ տեղումների հաջորդ օրը կենտրոնական բոլոր փողոցները մաքրված էին․ «Այնուամենայնիվ, անկախ նրանից՝ համատիրությունների հետ ինչ գործընթաց է տեղի ունեցել, նախ պետք է հասկանալ՝ եթե աղ ու ավազ տրամադրել ենք, ի՞նչ են արել․ բակերը որ տեսնում ենք, այդ տպավորությունը չի թողնում»։
Ավինյանը հորդորեց նաև ավազի՝ չափից ավելի օգտագործումն էլ բացառել. «Ոչինչ, թող միայն աղով լինի, որտեղ հնարավոր է, միայն աղով լուծենք, որովհետև հաջորդ խնդիրը այդ ավազի մաքրումն է»:
Քաղաքապետը նաև վարչական շրջանների ղեկավարներին հորդորեց հանդիպել համատիրությունների ղեկավարների հետ, և եթե հավելյալ ռեսուրսի խնդիր լինի, աղը տրամադրել։
