«Լուսավոր Հայաստան» խմբակցության պատգամավոր Գևորգ Գորգիսյանն ինքնամեկուսացվել է։
Տեղեկությունը մեզ հետ զրույցում հաստատեց Գորգիսյանի օգնականը։ Նա նշեց, որ պարետատնից զանգահարել են պատգամավորին և ասել, որ հունիսի 12-ին շփում է ունեցել մի անձի հետ, ով վարակված է եղել։
«Պարոն Գորգիսյանը մեկ թեստ արդեն հանձնել է, որը բացասական է եղել, սակայն մինչև ամսի 26-ը ինքնամեկուսանալու է, մյուսն էլ այդ ժամանակ կհանձնի»,-ասաց օգնականը։
Հիշեցնենք՝ հունիսի 23-ին՝ ժամը 11:00-ի դրությամբ, հաստատվել է կորոնավիրուսային հիվանդության ընդհանուր 21006 դեպք, որոնցից 10144-ը` առողջացած, 372-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 10364 պացիենտ: Ընդհանուր առմամբ կատարվել է 98117 թեստավորում:
Այսպիսով` ունենք կորոնավիրուսային հիվանդությամբ հաստատված 418 նոր դեպք և 1013 առողջացած։
Մահվան դեպքերի վերաբերյալ հայտնում ենք, որ պացիենտները եղել են 70 (տղամարդ), 73 (կին), 89 (տղամարդ), 53 (տղամարդ), 77 (տղամարդ), 59 (տղամարդ), 81 (կին), 60 (կին), 81 (կին), 80 (տղամարդ), 82 (տղամարդ) և 78 (տղամարդ) տարեկան: Բոլորն ունեցել են ուղեկցող քրոնիկական հիվանդություններ։
Նախորդ օրն արձանագրվել է մահվան 9 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 126 է:
