Հովհաննես Մանուկյանը «Ֆեյսբուք»-ի իր էջում հայտնել է, որ «Երևանի ավտոբուս» փակ բաժնետիրական ընկերության տնօրենի պաշտոնից ազատման դիմում է ներկայացրել։
«Տեղեկացնում եմ ձեզ, որ այսօր դիմում եմ ներկայացրել՝ ինձ աշխատանքից ազատելու։
Առաջին հերթին ուզում եմ խորին շնորհակալությունս հայտնել քաղաքապետին՝ ինձ վստահելու այս պատասխանատու և ծանր աշխատանքը։ Ինչպես նաև շնորհակալություն եմ հայտնում քաղաքապետարանի ողջ անձնակազմին՝ համագործակցության և բեղմնավոր աշխատանքի համար։ Եվ, իհարկե, ձեզ, սիրելի երևանցիներ՝ ամենօրյա ռեժիմով ինձ օգնելու համար։
Այս մեկ շատ դժվար տարվա ընթացքում փորձել եմ անել ամեն ինչ, որ երևանցիների կյանքը դառնա ավելի հարմարավետ և բարեկեցիկ։
Շնորհավորում եմ նոր տնօրենին պաշտոնին նշանակվելու կապակցությամբ, մաղթում եմ միայն նոր հաջողություններ և արդյունավետ ու կառուցողական աշխատանք։
Հավելեմ, որ մնալու եմ իմ Հայրենիքում և շարունակելու եմ իմ գործունեությունը մասնավոր դաշտում՝ ի շահ իմ հայրենակիցների։
Միշտ պատրաստ եմ լինել իմ քաղաքի և իմ Հայրենիքի կողքին»,- գրել է նա։
Հովհաննես Մանուկյանը այս պաշտոնին նշանակվել էր 2023 թվականի ապրիլի 3-ին:
