Ռուսաստանի Դաշնության Անվտանգության խորհրդի քարտուղար Նիկոլայ Պատրուշևը հայտարարել է, որ Ռուսաստանը իր գոյությանը սպառնացող վտանգի դեպքում ի վիճակի է ոչնչացնել ցանկացած հակառակորդի, այդ թվում՝ ԱՄՆ-ին։ Այս մասին նա ասել է «Ռոսիյսկայա գազետա»-ին տված հարցազրույցում։
«Ռուսաստանը համբերատար է և ոչ մեկին չի վախեցնում իր ռազմական առավելություններով։ Բայց նա ունի ժամանակակից եզակի զենքեր, որոնք կարող են ոչնչացնել ցանկացած հակառակորդի, այդ թվում՝ ԱՄՆ-ին, իր գոյությանը սպառնացող վտանգի դեպքում»,- ասել է Պատրուշևը։
Նրա խոսքով՝ Արևմուտքում «ինչ-որ մեկը», մոռանալով պատմության դասերը, արդեն խոսում է Ռուսաստանի նկատմամբ ռազմական հաղթանակի մասին։
Նա նշել է, որ ամերիկացի քաղաքական գործիչները կարծում են, որ կարող են կանխարգելիչ հարված հասցնել Ռուսաստանի Դաշնությանը, և այդ դեպքում Ռուսաստանը չի կարողանա պատասխանել։
Պատրուշևն այս փաստարկներն անվանել է «անհեռատես հիմարություն»։
