Հայաստանի արտգործնախարար Արարատ Միրզոյանը Ադրբեջանի արտգործնախարար Ջեյհուն Բայրամովի և ԱՄՆ պետքարտուղար Էնթոնի Բլինքենի հետ եռակողմ հանդիպմանը հայտարարել է, որ անհրաժեշտ է ներդնել միջազգային մեխանիզմներ Հայաստանի և Ադրբեջանի զինված ուժերի միջև հետագա էսկալացիաներից խուսափելու համար։
«Հանդիպմանը Արարատ Միրզոյանն ընդգծել է, որ Ադրբեջանի Զինված ուժերը պետք է դուրս բերվեն Հայաստանի ինքնիշխան տարածքից, անընդունելի են ուժի կիրառումը կամ դրա կիրառման սպառնալիքը, իսկ հետագա էսկալացիաները կանխելու համար պետք է ներդրվեն միջազգային մեխանիզմներ»,- հաղորդում է ՀՀ ԱԳՆ մամուլի ծառայությունը։
ՀՀ արտաքին քաղաքական գերատեսչության ղեկավարը նաև նշել է հումանիտար խնդիրների շուտափույթ լուծման կարևորությունը, այդ թվում՝ Ադրբեջանից բոլոր հայ ռազմագերիների վերադարձը։
«Միրզոյանը հաստատել է բանակցային գործընթացում ներգրավվելու հայկական կողմի պատրաստակամությունը»,- նշում են մամուլի ծառայությունից։
Հայաստանի ու Ադրբեջանի արտգործնախարարների և ԱՄՆ պետքարտուղարի հանդիպումը կայացել է ամերիկյան կողմի նախաձեռնությամբ՝ ՄԱԿ-ի Գլխավոր ասամբլեայի 77-րդ նստաշրջանի շրջանակներում։
