Շիրակի մարզպետ Նազելի Բաղդասարյանն այսօր ընդլայնված խորհրդակցություն անցկացրեց մարզի դպրոցների տնօրենների մասնակցությամբ՝ մի քանի նախազգուշացումներ անելով։ Նա հանձնարարեց խստիվ արգելել դրամահավաքն ավարտական բոլոր դասարաններում, դպրոցում չզբաղվել քաղաքականությամբ, ավելորդ հաստիքներ չպահել։ «Խնդրում եմ խիստ հետևողական լինել այս գործընթացին, սոցիալական բազմաբևեռվածությունը շատ ավելի ցցուն կերպով արտահայտվում է ավարտական դասարանների միջոցառումների հետ կապված, որն անթույլատրելի է։ Կլինեն մարդիկ, որոնք կկարծեն,թե ինչքան էլ հորդորենք, չի հաջողվի խուսափել այդ արատավոր երևույթից, բայց հավատացնում եմ ձեզ ՝միանգամայն հնարավոր է խուսափել այդ երևույթներից։ Բնականաբար, կլինեն դասարաններ ու երեխաներ, որոնք կուզենան ինչ-որ կերպ նշել, կարևորել այդ օրը, բայց հավատացեք առանց ավելորդ գումարների էլ դա հնարավոր է անել։ Խստիվ արգելել դրամահավաքներն ավարտական բոլոր դասարաններում։ Սա ոչ միայն 12-րդ դասարանին է վերաբերում, այլ 4-րդ դասարանին, 9-րդ դասարանին և դրանցից ածանցյալ տարբեր գործընթացներին։ Խնդրում եմ ավելի նրբանկատ լինել այն աշակերտների նկատմամբ, որոնք ավելի խոցելի սոցիալական խմբերում են և ձեր հնարավորությունների շրջանակում զրույց ունենալ այս աշակերտների հետ, որովհետև դժգոհությունները հիմնականում այս աշակերտների կողմից են և, կարծում եմ, որ իրենք ավելի անկեղծ են»,- ասաց մարզպետը։ Նազելի Բաղդասարյանն անդրադարձավ նաև աշակերտների հագուստի խնդրին։ «Ես չեմ ուզում բռնանալ որևէ աշակերտի իրավունքներին, բայց եկեք դպրոցը պահենք դպրոցին հարիր, բազմաթիվ շքեղությունմեր թույլ չտանք, որ դպրոց բերվեն և շատ դեպքերում ուսուցիչը մտնելով կաշկանդված չզգան աշակերտների ներկայությունից»,-ասաց մարզպետը։ Մարզպետի դիտարկմամբ՝ դպրոցը պետք է դուրս լինի ցանկացած քաղաքական գործընթացից։ Մարզի 29 դպրոցներում մրցույթներ են անցկացվել և որևէ տեղ, ըստ Նազելի Բաղդասարյանի, որևէ քաղաքական միջամտություն չի եղել։ «Որևէ քաղաքական հայացքի չպետք է հարի դպրոցը, դպրոցը կրթության և դաստիարակության տեղ է։ Սա խնդրանք ընդունենք, եթե խնդրանքը ի կատար չի ածվում, դրան հաջորդում են ավելի ծանր գործընթացներ»,- հայտարարեց Նազելի Բաղդասարյանը։
