«Ինձ համար նախ շատ անհասկանալի է, թե ինչո՞ւ չեն հաստատում կամ հերքում, գաղտնի ի՞նչ կա, ո՞վ է այդ գաղտնիքն օգտագործելու և ի՞նչ վնաս է տալու: Կամ եթե Սերժ Սարգսյանին հարցաքննել են, ՀՀԿ-ի մամուլի խոսնակը հանգիստ կարող է ասել, որ հարցաքննել են, որովհետև շատ բնական է, որ պիտի հարցաքննեին:
Սերժ Սարգսյանն այդ ժամանակ շատ լուրջ պաշտոնի էր. եղել է ՀՀ վարչապետ և այդ օրերի գործընթացները, տեղաշարժերը, տեղակայումներն առանց վարչապետի հրահանգի չէին կարող լինել:
Առանց նախագահի էլ հրահանգներ չեն լինում: Գլխավոր հրահանգ տվողը նախագահն է, բացառված է բանակի տեղաշարժն առանց նախագահի: Բայց այդ տեղաշարժի համար բենզին է պետք, մարդկանց պահեստներից սնունդ է պետք մատակարարել, փողոցային խոհանոցներ չեն բերվել քաղաք, չէ՞:
Բայց այդ մարդիկ, ովքեր տեղակայված են եղել քաղաքում, օրը երեք անգամ զինվորին հասանելիքը սնվել են: Այս ամեն ինչն արվել է կառավարության մակարդակով, պաշտպանության նախարարը կառավարության անդամ է, և վարչապետն այդ հարցերից չի կարող տեղյակ չլինել կամ այդ հրահանգներից անմասն լինել:
Պիտի կանչեն, հարցաքննեն։ Ս.Սարգսյանը կարող է իր փաստարկները բերել, ասել՝ ի՞նչ չափով է տեղյակ, ինքը հրահա՞նգ է կատարել, կո՞ղմ է եղել:», — հայտնել է «Հանրապետություն» կուսակցության նախագահ, ՀՀ նախկին վարչապետ Արամ Սարգսյանը factor.am-ի հետ զրույցում:
տեսանյութը՝ factor.am
