Իշխանությունները Թուրքմենստանի արեւելքում գտնվող Լեբապ նահանգի շրջաններից մեկի բնակիչներին ստիպում են սննդի հետ միասին գնել նախագահ Գուրբանգուլի Բերդիմուհամեդովի լուսանկարները:
Ալյուրն ու հացը վաճառքում են հայտնվել պետական խանութներում, որոնք վաճառվում են որպես մայիս և հունիս ամիսների չափաբաժին: Փաթեթի մեջ ներառված է Բերդիմուհամեդովի դիմանկարը՝ 50×35 սանտիմետր չափսերով, որն արժե 20 մանաթ (կենտրոնական բանկի պաշտոնական փոխարժեքով մոտ 6 դոլար, որը լրջորեն տարբերվում է սև շուկայում գործող փոխարժեքից):
Մարդիկ սնունդ գնելիս չեն բողոքել, քանի որ խանութների մոտ կանգնած են եղել ՆԳՆ աշխատակիցները:
Իշխանությունները կարծում են, որ եթե Բերդիմուհամեդովի լուսանկարը լինի յուրաքանչյուր տանը, ապա բնակչությունը «նրան ավելի շատ կսիրի»:
Նախագահի լուսանկարների վաճառքը համընկել է երկրի պետական հաստատություններում Բերդիմուհամեդովի դիմանկարների մասսայական փոխարինման ժամանակաշրջանի հետ: Բոլոր պետական գերատեսչություններում դրանք պետք է թարմացվեն մինչև սեպտեմբերի 1-ը:
Թուրքմենստանում նախագահի դիմանկարները առկա են բոլոր հաստատություններում և ձեռնարկություններում, ինչպես նաև հասարակական վայրերում: Դիմանկարները պարբերաբար թարմացվում են, այդ թվում նախագահի արտաքին տեսքի փոփոխություններից հետո: Հին դիմանկարները նորերով փոխարինելը կատարվում է բնակչության հաշվին:
