Կան մի քանի նշաններ, որոնք ցույց են տալիս COVID-19 կորոնավիրուսի վարակի ավելի ծանր ձեւը: Այս մասին Express- ի հետ զրույցում պատմել է Լոնդոնի առաջատար հիվանդանոցում վարակիչ հիվանդությունների կլինիկական ղեկավար Քերոլին Հեմսլին:
Նրա խոսքով՝ բոլոր մարդիկ կորոնավիրուսի վարակը տարբեր կերպ են տանում՝ ոմանք ոչ մի ախտանիշ չեն ունենում, ոմանց էլ վերակենդանացման բաժանմունքում է բուժում պահանջվում։
«COVID-19-ի ամենամեծ սպառնալիքներից մեկը դրա հետեւանքների անկանխատեսելիությունն է: Որոշ մարդիկ անախտանիշ են հիվանդանում, իսկ մյուսները ենթարկվում են ճգնաժամի, որից նրանք երբեք չեն կարող վերականգնվել: Այս ծայրահեղությունների մեջտեղում է գտնվում կորոնավիրուսի վարակի նշանների հիմնական միջակայքը»,- ասել է մասնագետը:
Նրա խոսքով՝ COVID-19-ի ամենատարածված ազդանշանները այն ախտանիշներ են, որոնք գրիպ են հիշեցնում.
- տենդ,
- մկանային ցավ
- գլխացավ,
- հոգնածություն:
Շատ մարդկանց մոտ նաեւ նկատվում են շնչառական վարակների դասական նշաններ.
- չոր հազ,
- շնչառության հետ կապված խնդիրներ,
- կոկորդի ցավ,
- քթի փակվել:
«Մենք այժմ գիտենք նաեւ, որ COVID-19-ի մյուս նշանները կարող են լինել հոտի եւ համի կորուստն ու աղեստամոքսային տրակտի խանգարումները: Միաժամանակ, նոր վիրուսով վարակված մեծ թվով մարդկանց մոտ այս ախտանիշները չեն դիտարկվում»,- ասել է դոկտոր Հեմսլին:
Վարակաբանը նաեւ բացատրել է, որ թվարկված նշանները մտահոգության առիթ չեն հանդիսանում՝ դրանք վկայում են կորոնավիրուսի վարակի բավականին մեղմ ձեւի մասին:
Բայց կան մի քանի նշաններ, որոնք մատնանշում են հիվանդության ավելի ծանր ձեւը.
- շնչարգելություն,
- անընդհատ տենդ,
- ցավ կրծքավանդակում,
- գիտակցության մեջ խառնաշփոթ.
«Եթե դուք չեք կարող նախադասությունն ավարտել առանց շնչարգելության, կամ ձեր շնչառությունը հաճախանում է ֆիզիկական ուժի բացակայության պայմաններում, կամ ձեր սովորական ամենօրյա գործողությունները կատարելիս շնչարգելություն եք զգում, ապա անպայման պետք է դիմել բժշկական օգնության»,- խորհուրդ է տվել մասնագետը:
Ախտանիշների սրման արագությունը նույնպես կարող է վկայել ռեակցիայի լրջության մասին: Մասնագետի խոսքով՝ սովորաբար հիվանդության ծանր ձեւի ախտանիշները վատթարանում են մեկ շաբաթ անց, երբ օրգանիզմը ցուցաբերում է ուժեղացված իմունային պատասխան: