Ամանորյա սեղաններին ծիսական կերակրատեսակները մեծ մասամբ մատուցվում են, նրանց թվում՝ հարիսան, տոլման, կճախաշը (ընդեղենից պատրաստվող կերակուր), անուշապուրներ (չրեղենից պատրաստված կերակուրներ), ղափամա, տարեհաց, գաթաներ:
Պատրաստի տարեհացն իրենից ներկայացնում է օղագոտու վրա փոսիկներ ունեցող կլոր հաց, այն խորհրդանշում է պտղաբերությունն ու հարստությունը։ Տարեհացի երեսը սերմերով ու մրգերով զարդարելը խորհրդանշում է տարվա հացի և մրգերի առատության գաղափարը:
Երջանկության համար տարեհացի մեջ է դրվել մետաղադրամ կամ լոբու հատիկ և թխվել, իսկ հացը բաժանվել է տոնակատարության ժամանակ։ Համարվել է, որ նրան, ում տոնակատարության ժամանակ բաժին է հասնում լոբին, ապագա տարին կբերի երջանկություն և հարստություն։ Տարեհացի մեծություն կախված է ըստ ընտանիքի անդամների թվի։
Կարևոր է, որ ամանորյա սեղանին լինի տարեհացը: Բաղադրությունը հետևյալն է՝
- 5 բ. ալյուր
- 1 բ. ձեթ
- 1 բ. տաք ջուր
- 1 բ. շաքարավազ
- 1 թ. գ. սոդա
- 1 ճ.գ. քացախ
- 1 բ. մանացված ընկուզեղեն (ընկույզ, նուշ, կաղին, ծիրանակուտ)
- ½ բ. չամիչ
- կանեփ կամ քունջիթ՝ վրան ցանելու համար
պատրաստություն
Ալյուրին խառնել շաքարավազն ու սոդան. վրան լցնել ձեթը, քացախն ու ջուրը և շաղել: Խառնել մանրացված ընկուզեղենն ու չամիչը, տեղադրել ալյուրոտած ջեռոցի ամանում, մեջը խրել պայմանական միջինքը, վրան ջուր քսել, ցանել սերմերը և
թխել միջին ջերմաստիճանով ջեռոցում 35 – 40 րոպե: