2016թ. հունիսի 24-ին բացառիկ դեպք է տեղի ունեցել Ուկրաինայի պատմության մեջ:
Երկրի նորանկախ պատմության մեջ առաջին անգամ լույս աշխարհ է եկել բնական ճանապարհով բեղմնավորված հնգյակ: Հերոսուհի մայրը Օդեսայի 37-ամյա բնակչուհի Օքսանա Կոբելեցկայան է:
Հետաքրքիր է, որ նրա ընտանիքում երբեք նույնիսկ երկվորյակ չի եղել:
«Մեր ընտանիքներում՝ և՛ իմ կողմում, և՛ ամուսնուս, երբեք երկվորյակ կամ եռյակ չի եղել: Երբեք չէի մտածի, որ ինձ հետ կարող է սա տեղի ունենալ»,- պատմում է Օքսանան:
Նա և ամուսինն արդեն ունեին 3-ամյա դուստր և որոշել էին ևս մեկ երեխա ունենալ:
Ամուսինները զարմացել են, երբ հղիության 8-րդ շաբաթում ուլտրաձայնային հետազոտության ժամանակ իմացել են այս լուրը:
«Բժշկուհին, որը հետազոտում էր, անասելի ուրախացավ, չէ՞ որ այսպիսի բան շատ հազվադեպ է լինում հետազոտողի աշխատանքում: Հետո ճշգրտեց, որ 5 պտուղ հստակ երևում է, բայց կարող է և վեցերորդ լինել»,- հիշում է Օքսանան:
Ծննդաբերության ժամանակ ծննդկանի հետ բժիշկների ամբողջ թիմ է աշխատել, այդ թվում՝ բժշկության 2 պրոֆեսոր: Արդյունքում` լույս աշխարհ է եկել 5 հիասքանչ երեխա՝ 3 տղա և 2 աղջիկ: Նրանց անվանել են՝ Դենիս, Վլադիսլավ, Դավիթ, Դարյա և Ալեքսանդրա:
