ՀՀ էկոնոմիկայի նախարար Գևորգ Պապոյանը նոյեմբերի 13-ին այցելել է Moon Greenhouse ջերմատնային տնտեսություն։ Այս մասին տեղեկացնում են Էկոնոմիկայի նախարարությունից:
Գերժամանակակից սարքավորումներով հագեցած ջերմատնային տնտեսությունը զբաղեցնում է 4 հա տարածք և կառուցվել է ՀՀ էկոնոմիկայի նախարարության կողմից իրականացվող պետական աջակցության ծրագրի շրջանակում։
Տնտեսությունում աճեցվում է վարդի 35 տեսակ։ Արտադրանքն արտահանվում է Նիդերլանդներ, Լեհաստան, ԵՄ այլ երկրներ, ԱՄԷ, Կատար, Մոլդովա։ Ընկերությունն ունի շուրջ 60 աշխատատեղ։
Moon Greenhouse-ում կատարված ընդհանուր ներդրումների ծավալը կազմում է շուրջ 3 մլրդ 300 մլն դրամ, որից 2 մլրդ 200 մլն դրամը կազմում է «Ջերմատնային տնտեսություններին տրամադրվող վարկերի տոկոսադրույքների սուբսիդավորման ծրագրի» շրջանակում տրամադրված վարկային պորտֆելը։
Այցի շրջանակում նախարարին ներկայացվել են տնտեսության գործունեությունը, արտադրական հնարավորությունները, ինչպես նաև հայկական ծաղիկների՝ մասնավորապես հոլանդական շուկա արտահանման ծավալների ավելացմանն ուղղված դիտարկումները։
