Վարչապետ Նիկոլ Փաշինյանը «Համաշխարհային հայկական գագաթնաժողով 2026»-ում հայտարարել է, որ Թուրքիայի հետ նախկին Խորհրդային միության սահմանները դե յուրե ուժի մեջ են, և տարածքային ամբողջականության չճանաչման օբյեկտիվ խնդիր գոյություն չունի։
Վարչապետը համոզմունք է հայտնել, որ առաջիկայում Հայաստանի և Թուրքիայի միջև դիվանագիտական հարաբերություններ կհաստատվեն։
Անդրադառնալով հայ-թուրքական սահմանի դե յուրե կարգավիճակի վերաբերյալ հարցին՝ Փաշինյանն ասել է․ «Նախկին Խորհրդային Միության սահմանները դե յուրե ուժի մեջ են Իրանի Իսլամական Հանրապետության և Թուրքիայի հետ։ Այսինքն՝ տարածքի չճանաչելու խնդիր չկա, նման հարց չկա»։
Վարչապետը հավելել է, որ, իհարկե, Հայաստանը և Թուրքիան դեռևս դիվանագիտական հարաբերություններ չեն հաստատել, բայց համոզված է, որ առաջիկայում այդ հարաբերությունները կհաստատվեն՝ ճանաչելով միմյանց տարածքային ամբողջականությունը, ինքնիշխանությունը և սահմանները։
Փաշինյանն ընդգծել է, որ որևէ օբյեկտիվ փաստ չկա, որը կվկայի Թուրքիայի կողմից Հայաստանի տարածքային ամբողջականությունը չճանաչելու խնդրի առկայության մասին։
Անդրադառնալով սահմանամերձ Խոր Վիրապի հատվածին և պատմական Արտաշատ մայրաքաղաքի տարածքին՝ վարչապետը տեղեկացրել է այնտեղ իրականացվող ծրագրի մասին։
«Այնտեղ մենք ծրագիր ենք իրականացնում. գիտեք, որ այդտեղ գտնվում է մեր պատմական Արտաշատ մայրաքաղաքը, որը Արտաշես արքան է հիմնադրել… Իմ հանձնարարությամբ հիմա այնտեղ ծրագիր է իրականացվում, որպեսզի Արտաշատ հնավայրը, ամբողջությամբ մայրաքաղաքի ավերակների տարածքը, հասանելի լինի քաղաքացիների և զբոսաշրջիկների համար»,- ասել է Փաշինյանը։
