Ազգային ժողովի «Քաղաքացիական պայմանագիր» խմբակցության պատգամավոր Տաթևիկ Գասպարյանի խոսքով՝ խորհրդարանական ընտրություններին մասնակցած Հայաստանի քաղաքացիների մեծամասնությունը իրենց ուժին ձայն է տվել, որպեսզի իրականացնեն սահմանադրական բարեփոխումներ և խաղաղության գործընթացը ավարտին հասցնեն:
Ըստ նրա՝ վարչապետն ընդամենը ասել է, որ այս ճանապարհին արտահերթ ընտրությունների գնալը տարբերակներից մեկն է:
Հարցադրմանը՝ արդյոք չկա՞ մտավախություն, որ իշխող ուժը կարող է պարտվել կամ կրկին սահմանադրական մեծամասնություն չկազմել, Գասպարյանը նկատում է. «Ընդդիմության ձայներ ստանալը միմիայն հիմնված է ընտրակաշառքի վրա, բայց նույնիսկ կաշառքի և արտաքին ուժերի միջամտության պարագայում ընդդիմությունը չի կարող մեծամասնություն կազմել»:
Իշխող ուժի անդամը միաժամանակ տեսակետ է հայտնում, որ ընտրակաշառատու ուժերը չպետք է հնարավորություն ունենան մասնակցելու ընտրություններին: Վերջինս հույս ունի, որ այս մասով օրենսդրական կարգավորումներ կստեղծվեն:
Ըստ պատգամավորի՝ չպետք է նաև կենտրոնանալ Ադրբեջանից հնչող խոսույթի վրա. «Ամեն ինչ անելու ենք, որ խաղաղության պայմանագիրը կյանքի կոչվի կարճ ժամկետներում»:
Տաթևիկ Գասպարյանը «Հայկական ժամանակ»-ի տաղավարում խոսել է նաև այլ թեմաների մասին, որը կարող եք դիտել տեսանյութում:
