Մասյացոտնի թեմի կարգալույծ հռչակված հոգևոր առաջնորդ Գևորգ եպիսկոպոս Սարոյանի հայցն ընդդեմ Հայաստանյաց Առաքելական Եկեղեցու, կարճվել է։
Որոշումը կայացրել է Քաղաքացիական դատարանի դատավոր Էդգար Հովհաննիսյանը, պատճառաբանելով՝ վեճը ենթակա չէ քաղաքացիական դատավարության կարգով քննության, իսկ Սարոյանի և Եկեղեցու միջև աշխատանքային հարաբերությունների առկայությունն ապացուցված չէ։
Հիշեցնենք՝ կարգալույծ հռչակված Գևորգ եպիսկոպոս Սարոյանը Վեհափառ Հայրապետի հրաժարականը պահանջող 10 եպիսկոպոսների շարքում է:
Կաթողիկոսի աթոռը զբաղեցնող Գարեգին Բ-ն (Կտրիճ Ներսիսյան) Մասյացոտնի թեմի առաջնորդ Գերաշնորհ Տ․ Գևորգ եպիսկոպոս Սարոյանին ազատել էր թեմակալ առաջնորդի պաշտոնից։
Գևորգ եպիսկոպոս Սարոյանը դատական հայց էր ներկայացրել ՀԱՍԵ-ի դեմ իրեն պաշտոնում վերականգնելու պահանջով:
Դատարանը բավարարել էր հայցադիմումի միջնորդությունը և կիրառել հայցի բավարարման միջոց՝ վերականգնելով նրան իր պաշտոնում։
Օրեր անց՝ հունվարի 27-ին, Կտրիճ Ներսիսյանը Տեր Գևորգ եպիսկոպոս Սարոյանին կարգալույծ էր հռչակել, այսպիսով չկատարելով դատարանի որոշումը:
Դատական ակտը չկատարելու դեպքի առթիվ ևս նախաձեռնվել էր քրեական վարույթ:
